Ilustracyjnaje fota: vecteezy.com
— Jak ja trapiŭ na hetaje miesca? Ja byŭ studentam, moj adnahrupnik šukaŭ pracu, i ja vyrašyŭ adpravić reziume razam ź im, u mianie ž było šmat enierhii i volnaha času. Mianie ŭziali, a jaho nie.
Užo ŭ pieršyja paŭhadziny pracy na mianie nakryčaŭ klijent, choć ja ni ŭ čym nie byŭ vinavaty. Ja nie čakaŭ, što ludzi, jakija telefanujuć u bank, mohuć stavicca da supracoŭnikaŭ koł-centra jak da śmiećcia i być nastolki taksičnymi. Prytym, na majo ździŭleńnie, skandalistami čaściej akazvalisia ludzi ad 30 da 45 hadoŭ. A voś zusim maładyja, da 30 hadoŭ, akazvalisia vielmi vietlivymi i dobrazyčlivymi.
— Adkul vy viedali ab ich uzroście?
— Kali vy telefanujecie ŭ koł-centr banka z asabistaha numara, u rabotnika vyśviečvajecca ŭsia infarmacyja pra vas.
— Mnohim zdajecca, što samyja kanfliktnyja ludzi — heta piensijaniery.
— Piensijaniery zvyčajna nie telefanavali ŭ koł-centr, jany addavali pieravahu prychodzić nožkami ŭ adździaleńnie banka i vyrašać svaju prablemu «fejs tu fejs».
Kali za dzień adnamu apierataru koł-centra patelefanavali 50 čałaviek, hetaja źmiena ličyłasia spakojnaj. U dni, kali zakančvajecca termin płaciažu pa kredycie, byvała pa 200—250 zvankoŭ za 9-hadzinnuju źmienu.
Rekord Dziamjana — pryniatyja 307 zvankoŭ za 12 hadzin. Typovaja tema razmovy — čamu nie prachodzić apłata abo kolki treba zapłacić pa kredycie ŭ hetym miesiacy.
Jak minimum 10% zvankoŭ — ad skandalistaŭ. U składanyja dni taksičnymi byli da pałovy zvankoŭ.
— Typovy kanfliktny klijent — heta čymści niezadavoleny čałaviek, jaki telefanuje ŭ koł-centr banka, pasyłaje rabotnikaŭ pa ŭsich viadomych adrasach abo pieraličvaje prafiesii ŭsich svaich svajakoŭ.
Častaja situacyja — čałaviek nie moža zapłacić pa kredycie, telefanuje ŭ koł-centr i palivaje ciabie brudam, jak byccam heta ty prymusiŭ jaho ŭziać hety kredyt. Jašče mianie abvinavačvali ŭ tym, što Nacbank pryniaŭ niejkuju pastanovu, da jakoj ja nie maju nijakaha dačynieńnia.
Byŭ klijent, jaki chacieŭ aformić kartku, a našaja supracoŭnica jamu admoviła. Jon dva miesiacy telefanavaŭ pa ŭsich numarach i patrabavaŭ, kab jaje zvolnili. U vyniku bank padaŭ na jaho ŭ sud za dyskredytacyju, kab choć niejak uratavacca ad hetych zvankoŭ.
Stabilna paru razoŭ na tydzień ja čuŭ ad klijentaŭ pažadańnie śmierci mnie i majoj siamji. Pieršyja paŭhoda mianie ŭsio heta vielmi ŭražvała, ja navat prymaŭ zaspakajalnaje niejki čas.
Potym, kali telefanavaŭ taki čałaviek, ja prahavorvaŭ sam sabie: «Heta telefanuje čarhovy ***» — i vydavaŭ dziažurnuju frazu, što razmova zapisvajecca, a za abrazu možna patrapić pad sud. Zvyčajna hetaja fraza vyćviarežvała 99% ludziej.
Tut važny momant: supracoŭnik koł-centra nie mieŭ prava hrubić u adkaz. Byli prapisany praviły: kali klijent pačynaje razmovu dobrazyčlivym tonam, to i rabotnik u adkaz razmaŭlaje dobrazyčliva. Kali klijent hrubić, to supracoŭnik pierachodzić na niejtralny ton hołasu. Kali klijent pierachodzić na abrazy, to ŭ pieršy raz jamu nahadvajuć, što razmova zapisvajecca. Pry paŭtornaj abrazie supracoŭnik koł-centra mieŭ prava skazać: «Prabačcie, ale my zakančvajem razmovu» — i adklučycca.
— Dziaŭčynki-kalehi časta płakali, a chłopcy išli ŭ kuryłku i tam maciukalisia, pa-inšamu ŭsio heta vytrymać składana.
Časam nie vytrymlivali razmovy i prasili adno adnaho pieraklučyć skandalista na kahości inšaha. My zaŭsiody vyratoŭvali adno adnaho, padtrymka ŭ kalektyvie była vializnaj.
Čamu nie zvalnialisia? Ja byŭ hatovy syści ŭ pieršy ž tydzień, ale zarobak byŭ prosta vydatny. Heta byŭ 2014-ty, na toj čas płacili 5 młn rubloŭ niedenaminavanymi, dla studenta — supier. (Siaredni zarobak u 2014 hodzie składaŭ kala 6,2 młn rubloŭ. — Red.)
Zvyčajna na takim miescy maje kalehi trymalisia hod—dva, niekatoryja sychodzili jašče ŭ pieryjad vyprabavalnaha terminu. Chacia viedaju i tych, chto pracavaŭ pa piać hadoŭ. Ja syšoŭ praz paŭtara hoda, kali mnie prapanavali cikaviejšuju pasadu.
Dziakujučy hetamu dośviedu, ja navučyŭsia kantaktavać i staŭ bolš upeŭnieny ŭ sabie, ale z tych časoŭ nie lublu razmaŭlać pa telefonie. Ciapier raz na tydzień mnie treba ŭdzielničać u zvankach pa Zoom, dla mianie heta piekła. Navat z mamaj i babulaj ja zvyčajna pierapisvajusia.
