Fota: AR

Fota: AR

Źniknieńnie letniaha aptymizmu

Pra toje, što va ŭnutrypalityčnym błoku Kramla abmiarkoŭvajuć mahčymy rost sacyjalnaj niezadavolenaści siarod hramadzian — i niepakojacca z-za jaho, «Mieduzie» raspaviali dźvie krynicy, blizkija da administracyi prezidenta (AP). Pry hetym jany rastłumačyli, što hetyja abmierkavańni nie hruntujucca na sacyjałahičnych daśledavańniach. «Usia sacyjałohija ciapier skancentravanaja na vybarach (u vieraśni ŭ Rasii — adziny dzień hałasavańnia. — Red.), a biudžety na jaje davoli abmiežavanyja», — tłumačyć adna z krynic.

Abodva surazmoŭcy «Mieduzy» nazyvajuć vosień tradycyjnym časam rostu padobnaj niezadavolenaści. Uletku sacyjalnyja tryvohi adychodziać: ludzi zaniatyja adpačynkam i dačami. Uvosień ža rasijan pačynajuć turbavać składanaści, źviazanyja z pracaj; jany źviartajuć uvahu na rost koštaŭ — pry hetym letni adpuskny aptymizm źnikaje. 

«U pryncypie, leta — čas niejkaj paŭzy: ciapło, śvietła, pracoŭnyja budni prachodziać u fonavym režymie. Uvosień usie razumiejuć: napieradzie zima, dobraha nie čakaj», — iranizuje adzin ź ich. 

Padrychtoŭka dziaciej da 1 vieraśnia — dadatkovy tryhier sacyjalnaj napružanaści. Pa słovach adnaho ź blizkich da AP surazmoŭcaŭ «Mieduzy», ludzi niepaźbiežna paraŭnoŭvajuć, kolki jany vydatkavali na padrychtoŭku da škoły ŭ 2022 hodzie, kali Rasija pačała poŭnamaštabnuju vajnu z Ukrainaj, a kolki — u minułym; i maštab rostu koštaŭ stanovicca dla ich vidavočnym.

Abiedźvie krynicy źviartajuć uvahu na toje, što tema «śpiecapieracyi» pačynaje nadakučvać rasijanam, «jany stamlajucca ad jaje». Pry hetym surazmoŭcy vydańnia padkreślivajuć, što raniej cikavaść da vajennych dziejańniaŭ hłušyła sacyjalnuju niezadavolenaść: «Zatoje ŭ nas niama abstrełaŭ — chaj košty i vyraśli; ciažkaści nienadoŭha».

«A vosieńniu ludzi buduć viartacca dadomu i z vodpuskaŭ, i ź virtualnaha ŭdziełu ŭ «śpiecapieracyi». Toje, što adbyvajecca doma, im nie vielmi spadabajecca», — zajaŭlaje adzin z surazmoŭcaŭ «Mieduzy».

Uskosna pra stratu cikavaści častki praŭładna nastrojenych rasijan da vajny z Ukrainaj śviedčać vyniki apytańnia, praviedzienaha pryvatnym daśledčym chołdynham «Ramir». Zhodna ź im, dola achopu «Pieršaha kanała» źniziłasia ź lutaha 2022 hoda na 8,1%, a kanała «Rasija-1» — na 8% (abodva całkam kantralujucca Kramlom). Bolšuju častku efirnaha času rasijskaha TB ciapier zajmajuć palityčnyja tok-šou, dzie viadučyja i ŭdzielniki havorać pra Ukrainu i «varožyja krainy Zachadu». 

Ułady rychtujucca razdavać hrošy

Jašče adna pryčyna turboty Kramla — ​​zakryćcio vytvorčaściaŭ u rehijonach z-za sychod zachodnich kampanij. 

Prablemy ź biespracoŭjem čakajucca ŭ Kałužskaj vobłaści, dzie raźmieščanyja zavody bujnych zamiežnych aŭtavytvorcaŭ, Leninhradskaj vobłaści, dzie taksama jość bujnyja pradpryjemstvy, jakija naležali zachodnim ułaśnikam abo zaležać ad zachodnich pastavak, i ŭ inšych pramysłovych rehijonach. 

Adzinym srodkam baraćby z rostam sacyjalnaj niezadavolenaści ŭ palitbłoku AP bačać razdaču hrošaj nasielnictvu. 

«Uvosień niezadavolenych pastarajucca zakidać hrašyma. Chaj heta buduć paraŭnalna nievialikija sumy, ale ŭsio roŭna atrymać ich ludziam budzie pryjemna», — upeŭnieny adzin z surazmoŭcaŭ «Mieduzy».

Ciapier Pucin nastrojeny na «vajnu doŭhuju» — pra heta «Mieduzie» raspaviali try krynicy, blizkia da AP. 

Kreml bolš nie sprabuje ideałahična aformić hetuju stratehiju. Ułady raźličvajuć, što najbližejšym časam niezadavolenaść hramadzian atrymajecca «patušyć hrašyma».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?