Pieršyja darožnyja raboty na trasie S19 Sakołka-Kuźnica, jakaja viadzie da KPP «Kuźnica» (z boku Hrodna punkt propusku «Bruzhi»), zakrytamu ź listapada 2021-ha, startavali ŭ pačatku 2023 hoda.
Spačatku budaŭniki vysiakali drevy ŭzdoŭž budučaj darohi. Paśla jany pierajšli da ŭźviadzieńnia adnoj z raźviazak. Tym časam idzie budaŭnictva i bolš zachodniaha ŭčastka, tak zvanaha abychodu Biełastoka.
Uvohule novaja trasa S19 składajecca ź niekalkich siehmientaŭ, jakija, miarkujučy pa ŭsim, buduć adkryvacca ŭ rozny čas. Ciapier ža źjavilisia fota adrezka daŭžynioj u 10 kiłamietraŭ — ad nasielenaha punkta Krynicy da vuzła Biełastok-Zachad.
Taksama heta ŭčastak budučaj znakamitaj darohi «Via Karpatyja» — ad Kłajpiedy da Sałonik, ad mora da mora (prachodzić pa terytoryi siami dziaržaŭ).
Trasu abiacajuć adkryć dla ruchu ŭ 2024 hodzie. Praduhledžanyja čatyry pałasy, chutkasnaje abmiežavańnie — 140 km/h. Praciahłaść učastka pamiž Sakołkaj i Kuźnicaj — amal 16 km. Pieršyja 5,25 km buduć adpaviadać standartu kłasa GP (asnoŭny paskorany ruch), a nastupnyja 10,5 km novaha maršrutu — standartu chutkasnaj aŭtamahistrali.
Na samim pamiežnym pierachodzie zapłanavana da šaści pałos ruchu (dźvie pałasy ŭjezdu ŭ krainu i čatyry pałasy vyjezdu). Viadoma, što tut uźviaduć dźvie raźviazki i abstalujuć pierachody dla žyvioł.
Ahulny košt rabot pieravyšaje 520 młn złotych (u pieraraźliku bolš za 120 młn dalaraŭ).
Čytajcie taksama:
«Mnohija spadziajucca na chutkaje adkryćcio «Bruzhoŭ». Što kažuć hrodziency pra žyćcio ŭ «abłozie»
