20 lutaha, pierad refierendumam, dziaržkanał ANT pakazaŭ rolik pra chłopca. Zhodna ź siužetam, niekalki ludziej zatrymali za rassyłku listoŭ členam kamisij. Pa viersii dziaržśmi, u listach byli pahrozy, ź ich raspaŭsiudžvańniem źviazanyja kala 10 čałaviek. U tym liku pakazvali Ramana Karpuka, i zakadravy hołas śćviardžaŭ što Ramanu płacili pa taryfie 30 rubloŭ za 50 adpraŭlenych listoŭ.
U videa ANT byli pakazanyja teksty listoŭ, ale niejkich surjoznych pahroz u ich nie vidać. Zatoje možna zaŭvažyć zaklik ličyć hałasy sumlenna, paviedamlać ab parušeńniach padčas refierendumu, a taksama śpis artykułaŭ Kryminalnaha kodeksa z adkaznaściu za falsifikacyi.
Z zajaŭlenych 10 čałaviek ciapier sudziać tolki Ramana. Jon vučyŭsia na 1-m kursie ŭ Bresckim univiersitecie imia Puškina (praŭda, pakul siadzieŭ u izalatary ŭ čakańni suda, byŭ adličany). Na sudzie raspavioŭ, što ŭ 2021 hodzie zajmaŭsia raspaŭsiudžvańniem apazicyjnaha samvydatu «Brescki čas». Z telehram-čata hetaj haziety ŭ śniežni daviedaŭsia, što rychtujecca rassyłka listoŭ členam vybarčych kamisij. Prapanoŭvałasia razasłać peŭny tekst, i chłopiec adhuknuŭsia. Jaho dadali ŭ inšy telehram-čat, i 29 studzienia 2022 jon adpraviŭ pieršyja 49 listoŭ. 7 lutaha adpraviŭ jašče 50 štuk. A 8 lutaha jaho z maci zatrymali.
Doma pry vobšuku ŭ jaho znajšli jašče 100 kanviertaŭ. Na hetych kanviertach adpraŭnikom byŭ pakazany Andrej Hruško. A na listach, jakija Raman paśpieŭ adasłać, u hetaj jakaści pakazany Alaksandr Siemiančuk. Abodva — viadomyja brastaŭčanam sudździ, jakija nieadnarazova vynosili palityčna matyvavanyja prysudy.
Raman Karpuk pryznany palitviaźniem. Padtrymać jaho (listom, hrašovym pieravodam) možna pa adrasie: SIZA-7. 224030, h. Brest, vuł. Savieckich pahraničnikaŭ, 37.
