Eryk Arłoŭ-Šymkus — kupałaviec, muzyka hurtoŭ Harotnica mix i Luty Sakavik. Apošnija 12 sutak jon pravioŭ nie na scenie, a za kratami. Pry zatrymańni jaho źbivali dubinkami i pamiačali markieram, u kamiery adklučali aciapleńnie. Z Akreścina chłopiec vyjšaŭ u statusie padazravanaha pa kryminalnaj spravie.
Fota z Facebook
Eryka zatrymali na maršy 25 kastryčnika. A 18-j hadzinie jon byŭ na vulicy Arłoŭskaj, kali pačalisia vybuchi.
«My pabiehli chavacca ŭ padjezd — nas tam było čałaviek 15, kali nie bolš. Adzin mužčyna puskaŭ u kvateru schadzić u prybiralniu, papić vady. My staralisia cicha stajać. A paśla ŭ padjezd zajšli žychary, jakija pa inšy ideałahičny bok. U niejki momant babula kryknuła siłavikam: «Jany tut!», — raspaviadaje muzyka.
Častka ludziej paśpieła schavacca ŭ kvatery. Eryk zastaŭsia na leśvičnaj placoŭcy. Amapaŭcy zahadali ŭsim lehčy na prystupki i pačali vyvodzić mužčyn.
«Mianie vyvodzili apošnim. Kali spuskaŭsia na pieršy pavierch, bačyŭ, što chłopca źbivajuć dubinkami i maralna rychtavaŭsia. Mianie pastavili na kaleni — pa pravym ściahnie ja atrymaŭ dva ŭdary. Spytali, što tut rablu. Adkazaŭ, što spužaŭsia vybuchu. Paśla dva ŭdary pa levaj nazie. Spytali, dzie budu nastupny raz, adkazaŭ, što doma».
Dubinkaj raźbili Erykaŭ telefon. Na vulicy jaho padniali za vałasy i na levaj ščace pastavili mietku markieram. U aŭtazaku chłopcu prylacieła niekalki tumakoŭ pa hałavie.
Kupałaŭca dastavili ŭ Centralnaje RUUS.
«Kali chtości z supracoŭnikaŭ bačyŭ maju mietku, kazaŭ: o, nu ŭsie, ty papaŭ. Ja raspaviadaŭ adno — jany nadrukavali zusim inšaje. Sprabavali naviazać, što ja biŭ amapaŭca, padsoŭvali taki pratakoł. Ja, kaniečnie, padpisvać admoviŭsia, bo heta chłuśnia.
U RUUS čas ad času byli roznyja pahrozy, što sa mnoj zrobiać amapaŭcy. Ale na ščaście, bolš nichto nie biŭ», — dzielicca Eryk.
Pa «narodnych» artykułach 23.34 i 23.4 jamu dali 12 sutak. Aryšt chłopiec adbyvaŭ na Akreścina.
Supracoŭniki izalatara viali siabie pa-roznamu.
«Byvali takija, jakija niejtralna stavilisia. Byvali idejnyja — ty prosiš zvadzić u duš ci na špacyr, a tabie kažuć: «Ty na Płoščy svajo nahulaŭ». Ci: «Nahadaj, za što ty tut? Voś adsiadziš 12 sutak, tady pamyješsia i pahulaješ». U duš ja tak ni razu i nie patrapiŭ. Na špacyr mianie vyvieli na siomy dzień i za paru hadzin da vyzvaleńnia, što dziŭna: tam, zdajecca, była niejkaja pravierka.
Mianie pastajanna pieravodzili z kamiery ŭ kamiery, ja ŭ 5-6 za hety čas pabyvaŭ. Dva razy ŭ nas u kamiery adklučali aciapleńnie. Rezka: prychodzić niejkaja źmiena — i batareja robicca chałodnaj, mianiajecca — batareja ŭklučajecca znoŭ».
Pra toje, što pačali zatrymlivać muzykaŭ, Eryk daviedaŭsia jašče na Akreścina. Spačatku ŭbačyŭ praz vakienca pieradaču dla svajho siabra. U apošnija dni ŭ izalatary čuŭ, jak chtości śpiavaje mocnym charavym hołasam.
U adnoj z kamier, darečy, štodzień śpiavali dziaŭčaty. Niekatoryja nahladčyki im padyhryvali: «Davajcie «Kupalinku».
Muzyka ŭspaminaje, jak pres-słužba MUS chacieła zapisać ź im pakajalnaje videa:
«Ja im, miakka kažučy, admoviŭ, choć jany dźvie sproby zrabili. Kazaŭ, što nie daviaraju im i heta nie maje nijakaha pracesualnaha dačynieńnia da maich spraŭ. A jany zapytvali, ci kidaŭ ja kamiani».
2 listapada Eryka pavieźli ŭ Centralnaje RUUS, dzie jon daviedaŭsia, što prachodzić padazravanym pa kryminalnaj spravie. Jamu inkryminujuć padrychtoŭku abo aktyŭny ŭdzieł u dziejańniach, hruba parušajučych hramadski paradak (č.1 art. 342 Kryminalnaha kodeksa). U spravie ŭspłyŭ toj samy pratakoł, dzie zapisana, što muzyka biŭ amapaŭca.
«Dumaju, mocna paŭpłyvała, što ŭ mianie była taja mietka na tvary. Ale ja ničoha nie rabiŭ, kab na mianie zavodzili kryminalnuju spravu. U pieršy dzień ŭziali maje ankietnyja dadzienyja, na druhi była maja advakatka, i ja ad dačy pakazańniaŭ admoviŭsia. Ciapier mnie aficyjna zabaronieny vyjezd za miažu», — kaža Eryk.
Užo ŭ izalatary jon daviedaŭsia, što razam ź im pa hetaj spravie prachodzić jašče niekalki čałaviek.
Na zatrymańni tvorčaj intelihiencyi kupałaviec reahuje emacyjna.
Razam ź lidaram «Recha» Andrusiom Takindanham, jakoha zatrymali 7 listapada
«Kali źnik paet Strocaŭ, mianie heta začapiła, bo ja viedaju, nakolki jon biaskryŭdny čałaviek. Dla siłavikoŭ niavažna, chto ty — muzyka, supracoŭnik kabielnych sietak, ajcišnik ci mieniedžar siaredniaha źviana. Dla ich my prosta adzinki.
Na svaim sudzie ja kazaŭ, što ŭ mianie ŭ bližejšyja dni dva vystupy, kali mianie nie budzie, jany sarvucca, a kvitki ŭžo pradadzieny. Ale heta nijakim čynam nie paŭpłyvała».
U 2010-m Eryk taksama adbyvaŭ za kratami 12 sutak. Kaža, byŭ maralna hatovy, što i ciapier heta moža adbycca ŭ luby momant. Trymacca dapamahali dobryja ludzi, jakich sustrakaŭ u kamierach, i fizičnaja nahruzka.
«Ja kožny dzień pa kole chadziŭ vakoł stała. Paličyŭ, što 100 kołaŭ — heta adzin kiłamietr. I ŭ mianie była norma 8 km u dzień. Kahości, kaniečnie, heta razdražniała, ale my znachodzili parazumieńnie.
Nasamreč, kali b nie kryminalnaja sprava, dla mianie hetyja 12 sutak — niepryjemnaść, jakuju lohka pieražyć. Bo heta nie 25 sutak i nie 30, jak było ŭ niekatorych».
