Zaraz na kraŭdfandynhavaj placoŭcy «Vulej» prachodzić kampanija pa vydańni knihi pamiaci pra hienija minskaha andehraŭndu Kima Chadziejeva. Vychad knihi prymierkavany da jubileju myślara — naradziŭsia Kim Chadziejeŭ 17 listapada 1929 hoda, — u joj sabrany samyja roznyja pa nastroi ŭspaminy pra jaho.
Meta vydańnia — złučyć hałasy śviedkaŭ i pabačyć Kima Chadziejeva jak asobnuju źjavu čałaviečaj kultury.
Vialikaja pamiatnaja kniha «Kim. Vielikij prochožij» stvorana ŭ papularnym žanry mikraprozy, u jaje ŭvajšli teksty, vieršy, intervju, redkija fotazdymki i archiŭnyja dakumienty. Vydańnie — vynik suaŭtarstva amal 50 viadomych i talenavitych ludziej (siarod ich — Andrej Chadanovič, Julija Čarniaŭskaja, Adam Hłobus, Dźmitryj Strocaŭ, Juryj Chaščavacki), jano ŭtrymlivaje samyja cikavyja bijahrafičnyja źviestki pra hieroja apoviedu i daskanała ŭznaŭlaje atmaśfieru niekalkich dziesiacihodździaŭ alternatyŭnaj savieckaj realnaści.
Kim Chadziejeŭ vučyŭsia na fiłałahičnym fakultecie BDU, adkul, pavodle jaho ŭłasnaha śviedčańnia, u 1949 byŭ vyklučany za publičnyja zakliki da zabojstva Stalina.
Aryštavany i asudžany da źniavoleńnia. Pakarańnie adbyvaŭ u Leninhradskaj śpiecyjalnaj psichijatryčnaj balnicy turemnaha typu. Vyzvaleny sa śpiecpsichbalnicy 15 lutaha 1954 hoda. Viarnuŭsia ŭ Minsk. Pastupiŭ u Minski piedahahičny instytut. Ad hetaha času Chadziejeŭ udzielničaje, a zatym robicca lidaram roznych niefarmalnych hurtkoŭ i abjadnańniaŭ.
Znoŭ aryštavany 25 studzienia 1962 hoda. Asudžany pa častcy pieršaj artykuła 67 Kryminalnaha kodeksa BSSR («Antysavieckaja ahitacyja i prapahanda»). Chadziejeŭ znachodziŭsia va Uładzimirskaj turmie, na prymusovym lačeńni ŭ turemnaj psichijatryčnaj balnicy pry leninhradskaj turmie «Kriesty» (Leninhradskaj śpiecyjalnaj psichijatryčnaj balnicy turemnaha typu). Vyzvaleny ad prymusovaha «lačeńnia» 8 lipienia 1963.
Z 1960-ch hadoŭ Chadziejeŭ — kultavaja fihura minskaha intelektualnaha padpolla, «huru» minskaha andehraŭnda. U adnapakajovaj kvatery Kima Chadziejeva (vuł. Kisialova, d. 17, kv. 24) źbirałasia maładaja intelektualnaja elita, mnohija stanavilisia jaho vučniami. Praz hurtok Chadziejeva prajšli mnohija vidnyja dziejačy kultury Biełarusi, naprykład Uładzimir Rudaŭ, Mikałaj Zacharanka, Dźmitryj Strocaŭ, Julija Čarniaŭskaja, Andrej Chadanovič.
