Pačaŭsia zbor podpisaŭ za pomnik Maniušku ŭ Minsku 8
Pomnik znakamitamu kampazitaru Stanisłavu Maniušku prapanujuć pastavić na płoščy Svabody tvaram da hatela «Jeŭropa».
Na sajcie pačaŭsia zbor podpisaŭ pad zvarotam da staršyni Minskaha harvykankama Mikałaja Ładućki z prapanovaj pastavić pomnik u centry Minska da 200-hodździa Stanisłava Maniuški.
«My pierakananyja, što 200-hodździe našaha vialikaha ziemlaka, suśvietna viadomaha kampazitara Stanisłava Maniuški pavinna być adznačana cełym šeraham jubilejnych zachadaŭ, u tym liku ustanoŭkaj hodnaha pomnika. Najlepšym miescam dla pomnika, na dumku bolšaści ekśpiertaŭ, źjaŭlajecca skvier na płoščy Svabody ŭ Minsku, tvaram da hatela „Jeŭropa“. U siaredzinie XIX st. na miescy haścinicy „Jeŭropa“ znachodziŭsia Minski haradski teatr, dzie i adbyłasia premjera „Idylii“. Akramia taho, u niepasrednaj blizkaści da hetaha miesca znachodziacca inšyja pamiatnyja miaściny žyćcia i tvorčaści Stanisłava Maniuški»,- pišuć aŭtary zvarotu da Ładućki.
U zvarocie nazyvajuć Maniušku najbolš viadomym u śviecie minčukom XIX st.:
«Z usich dziejačaŭ kultury dasavieckaha pieryjadu, čyjo žyćcio i tvorčaść ciesna źviazanyja ź Minskam, niama, mabyć, nivodnaha, chto moh by supierničać z Maniuškam u maštabie talentu i sučasnaj viadomaściu ŭ śviecie».
Vialiki biełaruski i polski kampazitar Stanisłaŭ Maniuška (1819–1872) naradziŭsia ŭ vioscy Ubiel Červieńskaha rajona, vučyŭsia ŭ minskaj kłasičnaj mužčynskaj himnazii, naviedvaŭ muzyčnuju škołu pry minskim haradskim arkiestry pad kiraŭnictvam Daminika Stefanoviča, staviŭ na minskaj scenie svaje pieršyja muzyčnyja kamedyi.
Dla biełaruskaj kultury asablivaje značeńnie maje jahonaje supracoŭnictva ź Vincentam Duninym-Marcinkievičam, plonam jakoha stalisia 4 kamičnyja opiery, uklučajučy znakamituju «Idyliju» («Sialanka»), premjera jakoj adbyłasia ŭ Minsku ŭ 1852 hodzie, u jakoj upieršyniu paśla doŭhaha pierapynku prahučała sa sceny biełaruskaja mova.
