Jak vyhladaje siadziba Tadevuša Rejtana ŭ Hrušaŭcy, dzie prachodzić rekanstrukcyja
Hrušaŭka znachodzicca za 5 kiłamietraŭ ad Lachavič. Tut častkova zachavałasia siadziba staražytnaha šlachieckaha rodu Rejtanaŭ. Heta ŭžo ciapier — papularnaje dla turystaŭ miesca. A paśla zaviaršeńnia restaŭracyjnych prac i adkryćcia muziejnych ekspazicyj, mahčyma, stanie adnym z kulturnych centraŭ našaj krainy, piša Smartpress.
Siadzibny dom Rejtanaŭ u Hrušaŭcy da restaŭracyi. Fota: belkraj.by
Siońnia na terytoryi byłoha majontka možna ŭbačyć rodavy dom kanca XIX stahodździa, haspadarčyja pabudovy i toje, što ad ich zastałosia, muravanku kanca XVII stahodździa, u jakoj apošnija dni svajho žyćcia pražyŭ Tadevuš Rejtan, aleju, voziera, brukavanku, reštki parku i aharodžy. Taksama, niedaloka ad samoj siadziby, na ŭskrainie lesu, raźmiaščajecca hatyčnaja kaplica-pachavalnia rodu Rejtanaŭ.
Usie fota: Smartpress
Siadziba doŭhi čas znachodziłasia ŭ zaniadbanym stanie. Dziakujučy inicyjatyvie daśledčyka Źmiciera Jurkieviča i art-supołki imia Tadevuša Rejtana, a taksama haziety «Kultura», u Hrušaŭcy i ŭ roznych nasielenych punktach Biełarusi z 2013 pa 2018 hady pravodzilisia subotniki, letniki, plenery, fiestyvali i tematyčnyja mierapryjemstvy, pryśviečanyja Rejtanam i ich Hrušaŭskaj siadzibie.
Vałanciory zamacavali ŭ roznych miescach siadzibnaha kompleksu infarmacyjnyja ščyty z historyjaj majontka i rodu Rejtanaŭ.
Z 2014 hoda da adnaŭleńnia majontka pačała dałučacca i dziaržava. Stali pravodzicca maštabnyja dziaržaŭnyja subotniki. Srodki ź ich vykarystali dla padrychtoŭki prajekta adnaŭleńnia siadziby. Praź niekatory čas u majontku źjaviłasia achova.
Potym sumiesnymi namahańniami ŭdałosia atrymać hrant ad Jeŭrasajuza na restaŭracyju siadziby. Ahulnaja jaho suma składaje 1 327000 jeŭra. Ź ich 140000 unios biełaruski bok. Restaŭracyja pačałasia ŭ 2020-m hodzie.
Za apošnija 3 hady ŭ Hrušaŭcy byŭ častkova adnoŭleny siadzibny dom. Pracy jašče šmat, ale ŭžo ciapier bačny vynik.
U padvałach siadzibnaha doma płanujecca zrabić muziejnyja ekspazicyi, mastackuju halereju i filijał mastackaj škoły h. Lachavičy, navučency jakoj buduć pryjazdžać siudy na plenery.
Astatnija budynki kompleksu pakul zastajucca ŭ aŭtentyčnym stanie. Tolki «Muravanku» vałanciory art-supołki imia Tadevuša Rejtana časova nakryli šyfieram.
Čytajcie taksama:
