Rasijskaja karcina «Levijafan» režysiora Andreja Źviahincava vyjhrała prestyžnuju amierykanskuju premiju «Załaty hłobus» (Golden Globe Award) u naminacyi «najlepšy zamiežny film». Raniej film uvajšoŭ u top-10 najlepšych kinastužak hoda pa viersii Associated Press.
Kankurencyju «Levijafanu» ŭ baraćbie za «Załaty hłobus» skłali karciny «Mandaryny» (Estonija), «Ida» (Polšča), a taksama «Fors-mažor» (Šviecyja) i «Razvod Vivijan Amsalem» (Izrail). Biełaruskaja karcina jašče ni razu realna nie pretendavała ani na Hłobus», ani na «Oskar».
«Levijafan» Andreja Źviahincava raniej užo atrymaŭ niekalki ŭznaharod jeŭrapiejskich kinafiestyvalaŭ.
Hieroj filma — Mikałaj, žychar miastečka na bierazie Barancavaha mora. Pradažny mer sprabuje kanfiskavać u jaho majomaść. Hałoŭnyja roli ŭ dramie vykanali Alaksiej Sierabrakoŭ, Alena Ladova, Raman Madzianaŭ i Uładzimir Udavičenka.
Film Źviahincava žorstka vykryvaje sučasny stan rasijskaha hramadstva — karupcyju i zrastańnie Ruskaj pravasłaŭnaj carkvy z aŭtarytarnaj dziaržaŭnaj mašynaj.
Pa słovach samoha Źviahincava, žyvučy ŭ Rasii, adčuvaješ siabie, «jak na minnym poli».
«U vas niama asablivych pierśpiektyŭ — ni ŭ žyćci, ni ŭ prafiesii, ni ŭ karjery, kali vy nie «padklučanyja» da kaštoŭnaściaŭ sistemy. Heta durny hramadski ład, viečny praklon našaj terytoryi. Mnie 50 hadoŭ, i ja ni razu ŭ žyćci nie hałasavaŭ na vybarach, bo ja absalutna ŭpeŭnieny, što ŭ našaj sistemie heta całkam biessensoŭna», — skazaŭ Źviahincaŭ u intervju brytanskaj haziecie «Hardyjan».
Fota buro247.ru.
Apošnim rasijskim (a, dakładniej, savieckim) filmam, jaki da «Levijafana» byŭ uhanaravany «Załatym hłobusam», była «Vajna i mir» režysiora Siarhieja Bandarčuka ŭ 1969-m.
Hałoŭny «Załaty hłobus» — za najlepšy film-dramu — dastaŭsia karcinie Ryčarda Linklejtiera «Małalectva».
Za pryz u naminacyi «Najlepšy film-drama» taksama zmahalisia «Sielma» Avy DziuVernej, «Suśviet Styviena Chokinha» Džejmsa Marša, «Palaŭničy na lisaŭ» Beneta Milera i «Hulnia ŭ imitacyju» Mortena Tylduma.
Najlepšaj kamiedyjaj / miuzikłam pryznany «Hatel «Hrand Budapiešt» Uesa Andersana. Jon spaborničaŭ ź filmami «Berdmen» Alechandra Hansalesa Ińjarytu, «Čym dalej u les» Roba Maršała, «Honar» Metju Uorčasa i «Sent-Vinsent» Teda Mełfi stali finalistami u katehoryi «Najlepšaja kamiedyja ci miuzikł».
Najlepšym režysioram staŭ Ryčard Linklejter za film «Małalectva». Najlepšym scenaram byŭ abvieščany scenar da karciny «Berdmen» Alechandra Hansalesa Ińjarytu.
U katehoryi «najlepšy akcior» pieramoh Edzi Redmejn («Śviet Styviena Chokinha»), najlepšaj akciorkaj pryznanaja Džulijana Mur za rolu ŭ filmie «Usio jašče Elis».
Uznaharody za roli atrymali Patrycyja Arkiet («Małalectva») i Džonatan Kimbł Simans («Apantanaść»).
Emi Adams nazvanaja najlepšaj kamiedyjnaj aktrysaj za miuzikł «Vialikija vočy», a ŭ anałahičnaj mužčynskaj naminacyi pieramoh Majkł Kitan za hałoŭnuju rolu ŭ filmie «Berdmen».
Kievin Spejsi pryznany najlepšym vykanaŭcam hałoŭnaj mužčynskaj roli ŭ dramatyčnym sieryjale («Kartačny domik»), Rut Uiłsan nazvanaja najlepšaj aktrysaj ŭ dramatyčnym sieryjale («Kachanki»).
Najlepšym kamiedyjnym sieryjałam stała «Vidavočnaje» — ab prablemach transseksuałaŭ, najlepšym dramatyčnym — «Kachanki».
U naminacyi «najlepšy animacyjny film» pieramahła karcina «Jak pryručyć drakona — 2».
Samym skandalnym padziejaj cyrymonii stała paziravańnie Merył Stryp z žančynaj, apranutaj u paŭnočnakarejskuju vajskovuju formu. Cyrymoniju viali amierykanski kamiedyjny duet Cina Fej i Emi Poler.
«Załaty hłobus» ličycca svojeasablivaj raźminkaj pierad uručeńniem «Oskara» i druhoj pa prestyžnaści uznaharodaj u śviecie kino. «Hłobusy» prysudžaje Asacyjacyja zamiežnaj presy Halivuda.