Niekalki miesiacaŭ dypłamatam daviałosia pracavać u ciesnym budynku kansulata ŭ Minsku na vulicy Krapotkina. Heta adbyłosia paśla taho, jak biełaruskija ŭłady admovili Polščy ŭ pravie praciahu arendy raniejšaha budynka pasolstva na vulicy Rumiancava ŭ Minsku, jaki vykarystoŭvaŭsia jašče z savieckich časoŭ.
Lešak Šarepka zaklikaŭ biełaruskija ŭłady supracoŭničać z dakładčykam AAN pa pravach čałavieka ŭ Biełarusi i zajaviŭ pra niaźmiennaść pazicyi ES i Polščy ŭ adnosinach da Biełarusi:
«Umovy nie mianiajucca, umovy zastajucca raniejšymi. My čakajem, kab u Biełarusi nie było palitviaźniaŭ, a tyja palityčnyja dziejačy, jakija paciarpieli, buduć reabilitavanyja i zmohuć prymać udzieł u hramadskim žyćci Biełarusi. Polšča ŭ poŭnaj stupieni padtrymlivaje hetyja ŭmovy, i my čakajem dziejańniaŭ uładaŭ Biełarusi».
Havoračy pra nizki ŭzrovień dvuchbakovych adnosinaŭ, pasoł pryznaŭ: «My b chacieli lepšych adnosinaŭ, heta było b na karyść i Biełarusi, i Polščy. Nam, susiedziam, nie varta pavaročvacca śpinami adzin da adnaho».
Pavodle spadara Šarepki, Biełaruś i Polšča biez asablivych namahańniaŭ zmahli b u dva razy pavialičyć tavarazvarot, ale pytańnie ŭ ahulnym palityčnym i inviestycyjnym klimacie ŭ Biełarusi.
Nie nadta dobry ŭzrovień palityčnych adnosin upłyvaje na inšyja pytańni, u pryvatnaści, na konsulskija. U 2011 hodzie polskija konsulstvy ŭ Biełarusi vydali 300 tysiač viz, za 10 miesiacaŭ hetaha — užo 294 tysiačy viz, da kanca hoda čakajecca vydača da 350 tysiač viz, paviedamiŭ pasoł.
«I ŭsio heta robicca biez pavieličeńnia štatu konsułaŭ. Biełaruski bok nie pahadžajecca na pavieličeńnie kolkaści polskich konsułaŭ u Biełarusi, niahledziačy na ŭsie našyja prośby».
Spadar Šarepka pryznaŭ, što Biełaruś nie zacikaŭlenaja ŭ libieralizacyi vizavaha režymu, u pryvatnaści, nie reahuje na adpaviednyja prapanovy z Brusela, jakija byli pieradadzienyja ŭ Miensk jašče ŭ červieni minułaha hoda.
Pavodle słovaŭ pasła, z 2005 hoda niama nijakaha prahresu ŭ płanie libieralizacyi dziejnaści častki Sajuzu palakaŭ. Z hetym źviazana i majomasnaje pytańnie:
«Polšča pabudavała 16 Polskich damoŭ pa ŭsioj Biełarusi. Ciapier jany nie dziejničajuć tak, jak pavinny byli b».
Aprača taho, pryznaŭ pasoł, polski bok nie atrymlivaje dazvołu na ekshumacyju i pierapachavańnie pareštkaŭ polskich partyzan, jakija lažać prosta ŭ poli. Dahetul nia vyrašanaja prablema biełaruskaha śpisu katynskich achviaraŭ.
