U roliku sabaka Dudli źbirajecca na pracu, byccam jon -- mužčyna siarednich hadoŭ. Ad sabaki hieroja rolika adroźnivajuć tolki čałaviečyja ruki, jakija dapamahajuć jamu zašpilvać kašulu, a ad čałavieka -- vyraznaja sabačaja morda.
Videa pra Dudli studentka Čarli Kiłpatryk źniała dla univiersiteckaha kursu pa suviaziach z hramadskaściu,adznačaje techaskaja hazieta The Highlander.
U dziaŭčyny byŭ vybar - zavieści błoh abo źniać videa, jakoje pavinna było sabrać 1 000 prahladaŭ za paŭtara miesiaca. Za vykanańnie hetaj umovy studentam abiacali pastavić zalik.Čarli Kiłpatryk atrymała tysiačy prahladaŭ ŭsiaho za paru dzion, a ciapier jaje videa prahledzieli amal 700 tysiač razoŭ.
Siužet paŭtarachvilinnaha rolika pra Dudli prosty: sabaka pračynajecca pa budzilniku, paziachaje, čałaviečymi rukami zdymaje z vačej paviazku. Potym tymi ž rukami apranaje kašulu, čyścić zuby, śniedaje. Pry hetym na praciahu ŭsiaho rolika ciažka zrazumieć, dzie znachodzicca čałaviek, čyje ruki dapamahajuć sabaku pryvodzić siabie ŭ paradak. Stvarajecca ŭražańnie, što dałoniami kiruje sabaka.
Studentka z univiersiteta Techasa pilna sočyć za losam svajho tvoru.Miarkujučy pa jaje akaŭncie na YouTube, Kiłpatryk kožnamu karystalniku, jaki kapijuje jaje videa pad svaim nikam, piša list z pahrozaj paskardzicca administrataram na parušeńnie aŭtarskich pravoŭ.
Darečy, ź jaje akaŭnta možna zdahadacca, adkul u jaje ŭziałasia ideja stvareńnia rolika z Dudli: siarod upadabanych Čarli videa jość adno, na jakim sabaka, padobny na jaje hadavanca, biehaje pa chacie ŭ futbołcy, uklučaje televizar i varyć kavu. Praŭda, u hetaha sabaki niama čałaviečych ruk, i hledaču jon zdajecca prosta razumnaj žyviołaj, ale nie sabakačałaviekam. U cełym rolikaŭ, na jakich sabaki pavodziać siabie, jak ludzi, na YouTube davoli šmat.
