Pavodle amnistyi Leanidu Kavalovu skasavali 1 hod. Takim čynam, pakarańnie skłała 6 hod pazbaŭleńnia voli. Byłoha kiraŭnika BRSM pryznali vinavatym u atrymańni chabaru ŭ asabliva bujnym pamiery, paviedamlaje Radyjo Svaboda.
Taksama sud pryznaŭ hramadzianina Estonii Hunara Kaał vinavatym u tym, jon što spryjaŭ atrymańniu chabara. Jaho asudzili na 5 hod pazbaŭleńnia voli. Hunara ŭziali pad vartu ŭ zale suda.
Praces nad byłym namieśnikam staršyni Viciebskaha abłvykankama, a jašče raniej pieršym sakratarom CK BRSM Leanidam Kavalovym prachodziŭ u Minskim haradskim sudzie.Sud pačaŭsia jašče ŭ minułym hodzie, ale tolki 22 žniŭnia źjaviłasia pieršaja aficyjnaja infarmacyja pa hetaj spravie. Kavalova abvinavacili pavodle č. 3 art. 430 Kryminalnaha kodeksa (atrymańnie chabaru słužbovaj asobaj).
U spravie fihuravała suma chabaru ŭ 2,5 tys. jeŭra. Pa viersii abvinavačvańnia, hetyja hrošy H. Hunar u jakaści pasiarednika pieradaŭ ad dyrektara firmy, jakaja zajmajecca arhanizacyjaj fiejervierkaŭ, Kavalovu. Heta nibyta «ŭdziačnaść» za vyklučnaje prava na arhanizacyju fiejervierkaŭ na masavych mierapryjemstvach na Viciebščynie ŭ 2010-ym.
Pieradača hrošaj išła pad kantrolem KDB. Bo dyrektar firmy napisaŭ zajavu pra vymańvańnie ŭ jaho chabaru. A pry pieradačy im hrošaj estoncu, pravaachoŭniki zatrymali apošniaha. U vyniku Hunar Kaał pajšoŭ na supracoŭnictva.
Na sudzie Hunar Kaał i Kavaloŭ siabie vinavatymi nie pryznali. Prakuror prasiŭ dla Kavalova 7 hadoŭ kałonii z kanfiskacyjaj majomaści, Kaału — 5 hadoŭ z kanfiskacyjaj.
Zatrymany Kavaloŭ byŭ u červieni 2011 h.
