Lichavid: «Apazicyjnyja lidary marnujuć čas u mituśni pamiž saboj» 113

Mikita Lichavid paśla łukašenkaŭskaj turmy.

Mikita Lichavid siońnia.

Siońnia na sajcie radyjo «Svaboda» prajšła anłajn-kanfierencyja z byłym palitviaźniem, hramadskim aktyvistam Mikitam Lichavidam.

Mikita, u pryvatnaści, zakranuŭ pytańnie dyskusii z žonkaj Andreja Sańnikava Irynaj Chalip:

«Na žal, skłałasia paradaksalnaja situacyja. Z adnaho boku, ludzi, jakija chočuć svabody dla Biełarusi, pastajanna havorać, što ŭ krainie nie pavinna być cenzury, u krainie pavinien być pluralizm mierkavańniaŭ, my pavinny prysłuchoŭvacca adzin da adnaho.

Ale ŭ toj ža čas niekatoryja z hetych ludziej nie cierpiać alternatyŭnaha mierkavańnia, jakoje nie supadaje ź ich dumkaj.

Na žal, Irynie Uładzimiraŭnie nie spadabałasia toje, što ja skazaŭ u intervju radyjo «Svaboda», jana pierajšła na asoby i dazvoliła sabie lišniaje. Žonka byłoha kandydata ŭ prezidenty Sańnikava pazicyjanuje siabie jak palityk i pradstaŭlaje jaho intaresy, pakul jon znachodzicca ŭ turmie, na moj pohlad, nie mahła ŭ takoj formie vyražać svajo abureńnie maim vykazvańniem, kali jano tak jaje zakranuła. Siońnia ŭ siecivie razharnułasia dyskusija, ale, jak bačym, ludzi zbolšaha nie razumiejuć, čamu ŭsio adbyłosia ŭ toj formie. Takoha być nie pavinna.

Kali my nie padzialajem pazicyju inšaha, my pavinny kanstruktyŭna pra heta kazać, a nie pierachodzić na asoby, abrazy. My cyvilizavanyja ludzi.

Heta mahli być emocyi, ale ž heta było napisana, značyć, nad hetaj zajavaj dumali, asensoŭvali napisanaje.

(…)

Uvohule, liču, što naš kanflikt ź Irynaj — kančatkovaje śviedčańnie vielizarnaha razryvu pamiž apazicyjnaj viarchuškaj (kali možna tak skazać) i zvyčajnymi hramadzianami apazicyjnych pohladaŭ.

Ja išoŭ na Płošču nie na zaklik niejkich ludziej, ja išoŭ tudy z pokliču serca, heta było nieabchodna mnie, maim blizkim, majoj krainie. Tak,

i na Płošču ja znoŭ pajdu, bo ja viedaju, što pa-inšamu nielha, heta adzinaje vyjście, heta adzinaja mahčymaść skazać, što my nie chočam tak bolej žyć.

Apazicyjnyja lidary marnujuć čas u hetaj mituśni pamiž saboj, jakaja nie nabližaje nas da kančatkovaj mety.

Razryŭ pamiž šarahovymi hramadzianami i viarchuškaj apazicyi nastolki ž vielizarny, jak pamiž ludźmi i siońniašniaj uładaj. Na žal, apazicyjnyja lidery robiać vielmi mała, kab hetaja situacyja źmianiłasia».

Na pytańnie, «ci nie lepš prosta zaniacca vučobaj, lepš za miežami Biełarusi. Rychtavacca da budučyni» Mikita Lichavid adkazaŭ: «Mianie zaŭsiody ździŭlała pazicyja ludziej: pajedu za miažu, budu vučycca, a potym viarnusia i budu pracavać dziela novaj Biełarusi.

Bolš za 15 hadoŭ my ŭsio rychtujem hetych śpiecyjalistaŭ za miažoj, ale asablivaha efiektu niama. Za hety čas užo stolki śpiecyjalistaŭ padrychtavana, što chopić na paŭtary Biełarusi. A potym, ja nie vielmi lublu byvać za miažoj, bo mnie tam sumna i chočacca dadomu.

A ŭ Biełarusi jość vialikaja kolkaść prablem, jakija treba vyrašać siońnia, a nie čakać, kali možna budzie pryjechać ź jeŭrapiejskimi dypłomami. Ni ŭ adnym univiersitecie nie navučać, jak padniać krainu, pierabudavać hramadstva, jakoje zapužana, raźjadnanaje. Tut nijaki dypłom nie dapamoža, treba pracavać pa-čornamu. Arać i arać».

* * *

Mikita Lichavid naradziŭsia 27 maja 1990 h. u Miensku. Vučyŭsia zavočna na jurydyčnym fakultecie niedziaržaŭnaha Minskaha instytuta kiravańnia.

Zatrymany 19 śniežnia 2010 h. na płoščy Niezaležnaści padčas akcyi pratestu suprać falsifikacyi vynikaŭ vybaraŭ. Asudžany na 15-sutkavy aryšt, ale 23 śniežnia pastanova ab aryšcie była admienienaja i Lichavida pieraviali ŭ status abvinavačanaha ŭ spravie ab udziele ŭ masavych biesparadkach. Z Žodzinskaha SIZA pieraviali ŭ minskuju «Vaładarku», a za dzień da sudu ― u kamieru da abvinavačanych u ciažkich złačynstvach.

29 sakavika 2011 h. sudździa Partyzanskaha suda Minska Natalla Pykina asudziła Lichavida na 3,5 hoda kałonii ŭzmocnienaha režymu. Adbyvaŭ pakarańnie ŭ Navapołackaj kałonii № 10. Abviaščaŭ haładoŭku suprać niespraviadlivaha prysudu. U kałonii pradstaŭlaŭsia «niezakonna asudžany Mikita Lichavid». Za heta nieadnarazova traplaŭ u štrafny izalatar, jaho źmiaścili na 3 miesiacy ŭ PKT ― pamiaškańnie kamiernaha typu.