Novuju piramidu Siarhiej Maŭrodzi nazyvaje ŭ duchu epochi – finansavaja sacyjalnaja sietka.
Mitynh prychilnikaŭ Maŭrodzi pierad vybarami ŭ Dumu.
«Bilety Maŭrodzi».
Siarhiej Maŭrodzi na svabodzie. 22 maja 2007 h.
Valeryj Bujak, zasnavalnik samaj viadomaj biełaruskaj piramidy «Sekaj».
11 studzienia ŭ Rasii startavała čarhovaja finansavaja piramida. Inicyjavaŭ jaje sumnaviadomy Siarhiej Maŭrodzi, stvaralnik pieršaj u Rasii finansavaj piramidy MMM. I voś jakoje supadzieńnie – novaja piramida taksama maje nazvu MMM. Całkam jaje nazva hučyć, jak «MMM-2011: my možam mnohaje». Novy sposab ryzyknuć aŭtar piramidy nazyvaje ŭ duchu epochi – finansavaja sacyjalnaja sietka.
Svoj manifiest Maŭrodzi apublikavaŭ na piersanalnym sajcie. Jon pačynajecca z papiaredžańnia, nadrukavanaha čyrvonymi litarami na jarka-žoŭtym fonie (až vočy pačynajuć ślazicca). «Heta piramida, kali vam tak padabajecca heta słova. U tym sensie, što Sistema zamknionaja. Nijakich źniešnich pastupleńniaŭ – nie. Tolki hrošy samich udzielnikaŭ, jakim jany abmieńvajucca miž saboj. (Ułasna, nie hrašyma navat jany abmieńvajucca, a vebmani, jakija farmalna ŭvohule ništo. Zvyčajnyja fanciki)», – havorycca ŭ papiaredžańni.
Jak budzie dziejničać novaja piramida. Dobraachvotniki ab'adnoŭvajucca ŭ dziasiatki, jakimi buduć kiravać davieranyja asoby Maŭrodzi, tak zvanyja «dziasiatniki». Dziasiatki abjadnoŭvajucca ŭ sotni (kuratar – «sotnik»), sotni – u tysiačy («tysiačnik»).Šarahovyja ŭdzielniki sistemy majuć dačynieńni vyklučna ŭ miežach svajoj dziasiatki. Dla pačatku treba adčynić dva veb-rachunki ŭ sistemie WebMoney. Praz adzin ź ich buduć nabyvacca za vebmani virtualnyja MMM-dalary (kurs budzie vyznačany samim Maŭrodzi). Kurs virtualnaj valuty budzie raści na 20% u tydzień dla zvyčajnych udzielnikaŭ sistemy i na 30% – dla piensijanieraŭ, dekłaruje stvaralnik i novaj piramidy. Na druhi rachunak buduć prychodzić hrošy za pradadzienyja MMM-$. Kab ich pradać, treba paviedamić svajmu dziasiatniku. Toj vybiraje ź dziasiatki dobraachvotnika, jaki vykupić u vas vašy MMM-$. Admović dziasiatniku nielha, bo ŭ takim vypadku vas vydalać ź sistemy i zaniasuć u «čorny śpis». U jakaści kampiensacyi pry hetym možna budzie atrymać tolki pieršapačatkovy ŭniosak – sumu ŭ vebmani, na jakuju vy nabyli virtualnyja MMM-hrošy. Pracenty dla parušalnikaŭ praviłaŭ nie praduhledžvajucca.
U novaj piramidzie jość svaje abmiežavańni – kožny ŭdzielnik moža nabyć virtualnych MMM-$ na sumu nie bolej za 5000 WMZ. Abmiežavańniaŭ pa vyjhryšach i terminach abarotu «hrošaj» niama.
U svaim papiaredžańni Siarhiej Maŭrodzi nie chavaje taho, što piramida ŭ luby momant moža łopnuć, zahadzia namiakajučy na ŭłady, jakija, na jaho dumku «prykryli pieršuju MMM».Jon padkreślivaje, što ničoha nie budzie mieć z MMM-2011 («ja tolki ŭkazvaju šlach») i dadaje, što choča dapamahčy biednym, a bo «bahatyja i sami sabie dapamohuć».
Maŭrodzi raźličvaje na ŭdzieł u novaj piramidzie sotniaŭ tysiač čałaviek i abiacaje, što novy jaho prajekt pratrymajecca bolš za 10 hadoŭ. «A tam jaho čakaje pierazahruzka».
Čas pakaža, ci spraŭdzicca hety prahnoz. Pieršaja piramida Maŭrodzi, udzielnikami jakoj stali ad 10 da 15 miljonaŭ čałaviek, praisnavała kala 6 miesiacaŭ – ź lutaha pa žnivień 1994 h. Pavodle aficyjnych dadzienych, škoda, naniesienaja ŭkładčykam MMM, skłała bolš za $100 miljonaŭ, pa nieaficyjnych źviestkach – da $80 miljardaŭ. U 94-m ad turmy Maŭrodzi vyratavała bałatavańnie ŭ Dziarždumu. Paśla pazbaŭleńnia statusa deputata śledstva iznoŭ uziałasia za machinatara, ale jon zdoleŭ schavacca i byŭ aryštavany tolki ŭ 2003 h. Sud admieraŭ jamu 4,5 hady kałonii, jakija jon adbyŭ pad śledstvam.
Samaja znakamitaja finansavaja piramida Biełarusi
Reinkarnacyja MMM u Rasii daje nahodu pryhadać samuju viadomuju biełaruskuju finansavuju piramidu.
U pačatku 90-ch vykładčyk uschodnich adzinaborstvaŭ Valeryj Bujak abjeździŭ usiu krainu z pakazalnym vystupleńniami. Jon byŭ zasnalnikam sietki škołaŭ pad nazvaj «Sekaj». Zavajavaŭšy viadomaść, u 1994 h. Bujak stvaryŭ sietku firmaŭ pa ŭsioj Biełarusi, niekalki za miažoj, pravioŭ ahresiŭnuju rekłamnuju kampaniju. U bolšaści nazvaŭ utvoranych kampanij sustrakałasia słova «sekaj». Novyja firmy ŭžo nie zajmalisia navučańniem uschodnim adzinaborstvam. Jany pačali prymać hrašovyja ŭkłady ad nasielnictva.
Asablivaściu takich układaŭ było toje, što kožny z klijentaŭ firmy razam z kantraktam atrymlivaŭ... zarad enierhii ad senseja Bujaka. Taja enierhija nibyta mieła lekavyja ŭłaścivaści. Ludzi panieśli hrošy...
Usiaho klijentami firmaŭ senseja Bujaka stali kala 4000 čałaviek. Na momant krachu piramidy ŭ 1996 h. jaje stvaralniki «nahreli» svaich klijentaŭ bolš čym na miljon dalaraŭ. Tyja hrošy śledstva tak i nie adšukała. Valeryj Bujak atrymaŭ 10 hadoŭ turmy.
