Były ministr sielskaj haspadarki Vasil Lavonaŭ zaŭtra na rehistracyi kandydataŭ u prezidenty budzie pradstaŭlać Uładzimira Niaklajeva.
Sam kandydat zaraz znachodzicca za miažoj. «Dzie jon, daviedajeciesia zaŭtra. Minułyja dni Niaklajeŭ byŭ u Prazie. Zaŭtra ŭ Prazie jon dakładna nie budzie», — kaža siabra kamandy Niaklajeva Alaksandr Fiaduta.
«Čamu mienavita Lavonaŭ?
Bo heta davieranaja asoba kandydata. Naroŭni z Hienadziem Mikałajevičam Buraŭkinym heta samyja pavažanyja ludzi ŭ nas jak pa ŭzroście, tak i pa dośviedzie pracy», — praciahvaje A.Fiaduta.
Vasilu Lavonavu 72 hady. Były deputat Viarchoŭnaha Savieta. Ad 1994 pa 1997 zajmaŭ pasadu ministra sielskaj haspadarki. 11 listapada 1997 aryštavany ŭ svaim rabočym kabiniecie. Padazravaŭsia ŭ padrychtoŭcy teraktu suprać staršyni Mahiloŭskaha dziaržkantrolu Ja.Mikałuckaha.
14 studzienia 2000 hodu rašeńniem Viarchoŭnaha Sudu byŭ pryznany vinavatym ŭ raskradańni dziaržaŭnaj majomaści ŭ bujnych pamierach i atrymańni chabaru ŭ sumie ekvivaletnaj $115.
Byŭ asudžany na čatyry hady pazbaŭleńnia voli. Praź dzieviać miesiacaŭ paśla sudu, 5 kastryčnika 2001 byŭ vyzvaleny pavodle amnistyi.
Lavonaŭ aktyŭna ŭdzielničaŭ u pieradvybarčaj kampanii Uładzimira Hančaryka ŭ 2001 hodzie. A potym źjechaŭ u Maskvu.
Pra mahčymyja suviazi «Havary praŭdu» ź Lavonavym adznačałasia daŭno, ale nijakaj peŭnaści nie było da hetaha momantu. Mahčyma, što mienavita ź Lavonavym moža być źviazanaje finansavańnie kampanii.
Kali na rehistracyju pryjdzie asabista Alaksandr Łukašenka, to moža adbycca vielmi cikavaja sustreča ź Lavonavym.
