U spravavodstva Hrodzienskaha abłvykankama budzie ŭkaraniacca mova. A supracoŭnikam rajać razmaŭlać na pracy pa-biełarusku.
Ź inicyjatyvy staršyni Hrodzienskaha abłvykankama Siamiona Šapiry pryniata rašeńnie ŭkaraniać biełaruskuju movu ŭ spravavodstva dziaržaŭnaj ustanovy, paviedamlaje radyjo «Racyja». Pa słovach pres-sakratara Hrodzienskaha abłvykankama Viktara Žaleźniakoviča, havorka idzie pra vusnuju prapanovu Šapiry. Sam staršynia naradzie ciapier viadzie pa-biełarusku. Nastupnym krokam musić stać abaviazkovaje vałodańnie biełaruskaj movaj kiraŭnikami rajonnaha ŭzroŭniu.
Staršyniu Tavarystva biełaruskaj movy Aleha Trusava inicyjatyva kiraŭnika Hrodzienščyny nie ździviła. «Kali ja ad imia TBM pavinšavaŭ Siamiona Šapiru z abrańniem na pasadu staršyni abłvykankamu, jon dasłaŭ mnie vialikuju telehramu na dobraj biełaruskaj movie, u jakoj padziakavaŭ za vinšavańnie i paabiacaŭ macavać movu ŭ rehijonie». Pa słovach A. Trusava, novy kiraŭnik vobłaści vyhadna roźnicca ad svajho papiarednika. «Vielmi kulturny čałaviek, nie toje što mahiloŭskija chłopcy, maje ziemlaki». Staršynia TBM zhadvaje taksama pryncypovuju pazicyju Šapiry pa prablemie Kałožy. «Spadziajusia, što jon paspryjaje tamu, kab sajt univiersiteta imia Janki Kupały akramia kitajskaj movy, zajmieje i biełaruskuju», — dadaje sp. Trusaŭ.
Chto jašče z kiraŭnikoŭ abłaściej vykazvaje prychilnaść da biełaruščyny? «Na pieršaje miesca ja pastaŭlu kiraŭnika Mahiloŭščyny Piatra Rudnika. Jon padtrymlivaje miascovaje TBM, vystupiŭ z prapanovaj praviadzieńnia hoda Rodnaj movy. Šmat čaho dobraha zrabiŭ» — kaža A. Trusaŭ. Druhoje miesca ŭ simvaličnym rejtynhu atrymlivaje Siamion Šapira, a na trecim apynajecca staršynia Viciebskaha abłvykankama Alaksandr Kosiniec. «Na listy adkazvaje pa-biełarusku, u razmovie movy nie curajecca».
Uvohule, miarkuje staršynia TBM, siarod siońniašnich kiraŭnikoŭ abłaściej i rajonaŭ niama vorahaŭ biełaruščyny. «Prychodzić novaje pakaleńnie, ja ich nazyvaju dziećmi Adradžeńnia. Hetyja ludzi vyraśli ŭ časy niezaležnaści. Tamu ŭ cełym, situacyja siońnia lepšaja, čym hady 2-3 tamu».
