Urad byłoha ŭkrainskaha prem'jer-ministra Julii Cimašenka prysvoiŭ amal paŭmiljarda dalaraŭ, pavodle spravazdačy troch amierykanskich aŭdytarskich kampanij.
Try firmy byli naniatyja ŭradam ciapierašniaha prezidenta Ukrainy Viktara Janukoviča. Aŭdytary zajavili, što ŭrad Cimašenki machlavaŭ i vykarystoŭvaŭ
«kłasičnyja mižnarodnyja miechanizmy admyvańnia hrošaj»padčas kupli cukru, vakcynaŭ, impartu darahich inšamarak i navat prodažu vuhlarodnych kredytaŭ u inšyja krainy.
Hałoŭny pamočnik Cimašenki Hryhoryj Niamyra nie pryznaŭ dobrasumlennym aŭdyt kampanijaŭ Trout Cacheris PLLC, Akin Gump Strauss Hauer&Feld LLP i Kroll Inc, nazvaŭšy jaho vysnovy palityčna matyvavanymi i niekampietentnymi.
Vyniki aŭdytu, jaki achoplivaje pieryjad z 2008 da pačatku hetaha hoda, śviedčać pra toje, što kabiniet Cimašenki vydatkavaŭ $140 młn na niamieckija mikraaŭtobusy nibyta dla pieradačy ich u karystańnie Ministerstvu achovy zdaroŭja, jakija nasamreč paźniej vykarystoŭvalisia dla mabilnaj rekłamy pieradvybarnaj kampanii Cimašenki.
Aŭdyt taksama zaśviedčyŭ, što były ŭkrainski ŭrad niezakonna prysvoiŭ kala $280 młn, atrymanyja ad prodažu vuhlarodnych kredytaŭ u miežach Kijockaha pratakoła, i nikoli nie vydatkoŭvaŭ hetyja hrošy na ekałahičnyja prajekty, jak taho patrabavała pahadnieńnie. Hetyja hrošy byli skiravanyja ŭ piensijny fond, jakomu patrabavalisia hrošy ŭ čas surjoznaha kryzisu.
Akramia taho, try aŭdytarskija firmy śćviardžajuć, što ŭrad Cimašenki rastraciŭ $24 młn na cukar, jaki va Ukrainu nikoli nie dastaŭlaŭsia, i niezakonna prysvoiŭ $44 młn padčas impartu vakcyn i miedycynskaha abstalavańnia.
«Rasśledavańnie vyjaviła złoŭžyvańnie dziaržaŭnymi srodkami i
vidavočnaje machlarstva z udziełam najvyšejšaha źviana byłoj ukrainskaj administracyi, kankretnych ministerstvaŭ i pryvatnych karparacyjaŭ»,— havorycca ŭ zajavie aŭdytaraŭ — i dalej:
«My sabrali šmat uskosnych dokazaŭ pavodzinaŭ, nietypovych dla sumlennych čynoŭnikaŭ i biznesoŭcaŭ».
Ananimnaja krynica va ŭradzie Ukrainy paviedamiła, što aŭdyt kaštavaŭ dziaržaŭnamu biudžetu $2 młn.
