Try kryminalnyja aŭtarytety Pastaŭščyny atrymali praciahłyja turemnyja terminy za zabojstva 1

Try kryminalnyja aŭtarytety Pastaŭskaha rajona Michaił Janukovič i jaho saŭdzielniki Aleh Zubkievič i Andrej Łukjanaŭ pryhavoranyja Mahiloŭskim abłasnym sudom da praciahłych terminaŭ pazbaŭleńnia voli za zabojstva dvuch raniej sudzimych žycharoŭ Pastaŭ.

Jak paviedamili va Upraŭleńni infarmacyi i hramadskich suviaziaŭ MUS Biełarusi, Janukovič i Zubkoŭ atrymali pa 23 hady pazbaŭleńnia voli, Łukjanaŭ — 13 hadoŭ.

Zabojstva było ŭčyniena ŭ 2007 hodzie padčas kryminalnaha razboru. Supracoŭniki Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS ustanavili, što

adzin sa złamyśnikaŭ pad vyhladam pieraprodažu ziamielnaha ŭčastka zavabiŭ dvuch raniej sudzimych asob na zakinuty chutar niepadalok ad litoŭskaj miažy. Tam jaho saŭdzielniki z zasady adkryli ahoń z abreza palaŭničaha ružža i małakalibiernaha pistaleta.

Cieły złačyncy zakapali ŭ lasnym masivie kala vioski Navasiołki-2 Pastaŭskaha rajona.

Padčas apieratyŭna-vyšukovych mierapryjemstvaŭ udałosia vyśvietlić, što złačynnaja hrupa Janukoviča rehularna zajmałasia vymahańniem, machlarstvam, hrabiažami, a taksama «kryšavańniem» kamiercyjnych struktur. U vyniku milicyjaniery zatrymali jašče vaśmiarych udzielnikaŭ hetaj hrupy. Zaraz usie jany znachodziacca pad vartaj u SIZA № 1 UDVP pa Minskaj vobłaści i Minsku.

Rasśledavańniem kryminalnaj dziejnaści pastaŭskaj złačynnaj hrupoŭki zajmajecca Hienieralnaja prakuratura Biełarusi sumiesna z HUBAZiK MUS. Hramadzianie, jakija paciarpieli ad jaje dziejańniaŭ, mohuć źviartacca pa nastupnych kantaktnych telefonach: 8-029-638-07-72 i 8-029-673-07-50.

Anastasija Janušeŭskaja, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH