«Ja raźličvaju pieramahčy Łukašenku, i heta budzie nie praz vybary, bo vybaraŭ u nas niama»,

— zajaviŭ pretendent na pasadu prezidenta Andrej Sańnikaŭ 21 červienia ŭ rasijskaj stalicy ŭ intervju radyjostancyi «Echo Moskvy» i telekanału RTVi.

Sańnikaŭ spadziajecca na pieramohu «praz pratest, praz toje, što ludzi zapatrabujuć źmieny ŭłady, praz toje, što adbudziecca pad naciskam ludziej, jakija stamilisia ad hetaj ułady biespardonnaj». «Ja zaraz šmat jezdžu pa Biełarusi,

i mnie kažuć, što biazładździe ŭžo nadakučyła», — zaznačyŭ jon.

«Tych, chto žadaje źmianić Łukašenku, dastatkova šmat, i tut razmova navat nie pra kandydataŭ, a pra toje, što ŭ hramadstvie adčuvajecca patreba raźvivacca niejak, tamu što my zaraz navat nie ŭ zastoi znachodzimsia, a skacilisia vielmi nizka i vielmi hłyboka», — zajaviŭ palityk.

«Ja chaču, kab situacyja ŭ Biełarusi pamianiałasia, kab ułada pamianiałasia, — skazaŭ jon. — Ja dumaju, što zmahu danieści hety svoj impuls da ludziej.

Ludzi stamilisia ad hetaj ułady. 16 hadoŭ — zanadta šmat».

Na dumku Sańnikava, ruch u Jeŭropu — «adziny šlach, jaki zabiaśpiečyć narmalnaje raźvićcio». «Z hetaj uładaj my nikudy nie prasuniemsia», — miarkuje jon.

«Biełaruś budzie zaŭsiody stratehičnym partnioram Rasii, Rasija zaŭsiody budzie stratehičnym partnioram Biełarusi, ale tym nie mienš my pavinny być u Jeŭropie, — padkreśliŭ Sańnikaŭ. — Tut niama nijakaj supiarečnaści. Inakš usio heta budzie praciahvacca biaskonca: małočnyja vojny, miasnyja, cukieračnyja, cukrovyja i h.d. My pavinny mieć pradkazalnyja, narmalnyja, prazrystyja adnosiny».

«Kali ja kažu, što Łukašenka — pradukt Rasii, heta sapraŭdy tak, bo, niahledziačy na ŭsie jaho vykruntasy, Rasija pastajanna jaho padtrymlivała. Nadyšoŭ momant, kali ŭsie vyjhrajuć ad taho, što źjavicca pradkazalnaść u hetych adnosinach.

I ja hatovy abmiarkoŭvać hetyja pytańni budučyni Biełarusi i budučych adnosinaŭ Rasii z kim zaŭhodna», — skazaŭ Sańnikaŭ.

Jon vykazaŭ naściarožanaść u dačynieńni da Mytnaha sajuza: «Mnie niezrazumieła, što takoje Mytny sajuz. Ja za toje, kab stvarałasia zona svabodnaha handlu, ale ja nie viedaju, ci nie budzie heta čarhovaj pieraškodaj dla libieralizacyi handlu i ekanomiki».

Sańnikaŭ taksama zajaviŭ, što Biełaruś nie pavinna ŭstupać u NATO, ale nieabchodna ciesnaje supracoŭnictva z hetaj arhanizacyjaj.

Palityk vykazaŭsia za viartańnie hierba «Pahonia» i bieł‑čyrvona‑biełaha ściaha ŭ jakaści dziaržaŭnych simvałaŭ i za biełaruskuju movu ŭ jakaści adzinaj dziaržaŭnaj.

Pry hetym jon padkreśliŭ, što vyras u ruskamoŭnaj siamji.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?