Asnoŭnaj temaj sustreč stanuć pytańni funkcyjanavańnia Mytnaha sajuza Biełarusi, Kazachstana i Rasii.
Jak paviedamlaje pres-słužba Łukašenki, na 11 červienia zapłanavany sustrečy kiraŭnika biełaruskaj dziaržavy z prezidentam Rasiei Dźmitryjem Miadźviedzievym i staršynioj urada Uładzimiram Pucinym, a taksama naviedvańnie Usierasijskaha navukova-daśledčaha instytuta elektramiechaniki. Asnoŭnaj temaj sustreč stanuć pytańni funkcyjanavańnia Mytnaha sajuza Biełarusi, Kazachstana i Rasii. Paradak pieramovaŭ taksama ŭklučaje «šerah aktualnych pytańniaŭ dvuchbakovaha biełaruska-rasijskaha supracoŭnictva».
7 červienia Łukašenka i Miadźviedzieŭ kantaktavali pa telefonie i vyznačyli prykładny pieralik pytańniaŭ, jakija płanujecca abmierkavać padčas sustrečy na vyšejšym uzroŭni. Baki damovilisia «daručyć vice-premjeru ŭrada, jaki kuryruje pytańni Mytnaha sajuza, padrychtavać da sustrečy kiraŭnikoŭ dziaržaŭ roznyja kampramisnyja varyjanty rašeńnia prablem, jakija strymlivajuć efiektyŭnaje funkcyjanavańnie hetaha sajuza i stvareńnie AEP».
«Lidery Biełarusi i Rasii adzinyja ŭ mierkavańni, što sustreča pavinna być maksimalna kankretnaj i dziejsnaj. Jana zaklikanaja stać važnym impulsam u raźvićci intehracyjnych pracesaŭ z udziełam našych krain», — adznačałasia ŭ paviedamleńni pres-słužby biełaruskaha prezidenta.
U svaju čarhu pres-słužba Kramla paviedamiła, što razmova adbyłasia pa inicyjatyvie biełaruskaha boku. U chodzie hutarki «była paćvierdžana damoŭlenaść praciahnuć abmierkavańnie pytańniaŭ farmiravańnia Mytnaha sajuza ŭ śviatle rašeńniaŭ, pryniatych Rasijaj i Kazachstanam u chodzie pasiadžeńnia vyšejšaha orhana MS na ŭzroŭni kiraŭnikoŭ uradaŭ u Sankt-Pieciarburzie 21 maja hetaha hoda».
21 traŭnia ŭ Sankt-Pieciarburhu kiraŭniki ŭradaŭ Rasiei, Biełarusi i Kazachstana ŭ chodzie šmathadzinnych pieramovaŭ nie zmahli ŭrehulavać sprečki ab ustupleńni ŭ siłu Mytnaha kodeksa 1 lipienia hetaha hoda. Uładzimir Pucin adznačyŭ tady, što roznahałośsi tyčylisia aŭtamabilnaj i avijacyjnaj pramysłovaści, mytnych pošlin, uvozu tavaraŭ fizičnymi asobami dla ŭłasnych patreb.
28 traŭnia ŭ Sankt-Pieciarburhu premjer-ministry Rasii i Kazachstana damovilisia ab uviadzieńni Mytnaha kodeksa Mytnaha sajuza na dvuchbakovaj asnovie. Dakumient adkryty dla padpisańnia Biełaruśsiu. Kiraŭnik biełaruskaha ŭrada na pieramovy nie prybyŭ. Uładzimir Pucin zajaviŭ, što Rasieja i Kazachstan buduć ustupać u SHA ŭdvaich, kali Minsk nie dałučycca da damovaŭ Mytnaha sajuza.
1 červienia na sustrečy ź pieršym vice-premjeram Rasiei Iharam Šuvałavym u Minsku Alaksandr Łukašenka zajaviŭ, što «Biełaruś moža pajści na kampramisnyja rašeńni ŭ Mytnym sajuzie pry ŭmovie raŭnapraŭnaha i pavažlivaha staŭleńnia z boku inšych udzielnikaŭ».
