12-13 červienia ŭ Siličach projdzie fest «Dzień siamji» z udziełam takich hurtoŭ, jak «Pałac», «Bieź Bileta», Drum Ecstasy. Kancert ładzić tvorčaje abjadnańnie «PAN-studyja». Akcyja prachodzić pry padtrymcy BRSM, pra što muzyki daviedalisia tolki ad «Tuzina Hitoŭ».
Fest 12-13 červienia pazycyjanujecca jak siamiejny. Tvorčaje abjadnańnie «PAN-studyja» daŭno ŭžo raspracoŭvała ideju takoj muzyčna-spartovaj akcyi, dzie možna jak zhulać u piejntboł dy pazajmacca aerobikaj, tak i pazapuskać burbałki dy pasłuchać aktualnuju biełaruskuju muzyku. Idejaj zacikavilisia ŭładnyja struktury, a padtrymku vykazaŭsia zabiaśpiečyć Biełaruski respublikanski sajuz moładzi.
«My byli suprać udziełu BRSMu ŭ hetaj akcyi, ale nam skazali, što bieź jaho padtrymki budzie składana zrabić fest.
BRSM pastaŭlaje na fest vałancioraŭ, a taksama spryjaje ŭ rekłamie mierapryjemstva pa svaich kanałach. Nakont praviadzieńnia ich ułasnych akcyj u miežach festu havorki nie było», — patłumačyŭ «Tuzinu Hitoŭ» kiraŭnik «PAN-studyi» Dźmitry Saładucha.
Udzielnikam kancertnaha šou pra padtrymku BRSM i źmiaščeńnie łoha hetaj arhanizacyi na afišach ničoha nie paviedamili. «Mnie vielmi niepryjemny hety fakt, — kaža lider hurtu «Pałac» Aleh Chamienka. — My padpisvali z arhanizatarami damovu, dzie nie było ni słova pra hetu arhanizacyju. Kali b nas pra heta prainfarmavali, mahła być inšaja damovy dy zusim inšyja patrabavańni».
«My naściarožana stavimsia da padobnych arhanizacyj, ale absalutna vitajem ideju festu dla ŭsioj siamji.
Tamu kali BRSM dapamoža ŭ jaho arhanizacyi dy pakaža siabie ŭ lepšym śviatle, dyk i ludzi jaho ŭrešcie rešt palubiać», — kaža Vitalik Artyst z kamandy «Bieź Bileta», jaki niamała ździviŭsia hetaj navinie.
Ale bolš za astatnich daŭsia dzivu Fił Čmyr z Drum Ecstasy, adnaho z hurtoŭ, jaki razam z «Pałacam» ciaham piaci hadoŭ znachodziŭsia pad niehałosnaj zabaronaj.
«Niajnačaj ź nieba zvaliŭsia hety BRSM… Ale ž u našaj krainie nastolki składanaja situacyja, što biez padtrymki dziaržavy tut aničoha nie praviadzieš. My padtrymlivajem kankretna fest «Dzień siamji» navat kali na im budzie prysutničać sam Satana. I kali dziaržaŭnyja hrošy pojduć na dobryja spravy, dyk čamu nie. Kali ž srodki iduć na biazhłuzduju dziejnaść — viadoma, my suprać».
Fest u Siličach pačniecca ŭ 12:00 12 červienia z spartovaj prahramy. Kancert projdzie z 18:00 da 23:00. Rok-muzyku pradstaviać «Pałac», «Bieź Bileta», Drum Ecstasy. Elektronnuju — Karen Karapiecian feat DJ Mongol, Hanz & Gruber.
