Z 9 pa 12 červienia ŭ Minsku, u kinateatry «Centralny», adbudziecca pakaz sučasnych šviedskich mastackich filmaŭ.
Biełaruskim hledačam buduć pradstaŭleny čatyry poŭnamietražnyja stužki šviedskich režysioraŭ: «Štučnaje dychańnie» (9 červienia ŭ 18:30), «Dazvol mnie ŭvajści» (10 červienia ŭ 18:30), «Štorm» (11 červienia ŭ 18:30) i «Soniečny štorm» (12 červienia ŭ 18:30).
Drama «Štučnaje dychańnie» (2005) režysiora Bjorna Runhie raspaviadaje historyju maładoj dziaŭčyny Viery (Safija Vestbierh), jakaja pakidaje svaich baćkoŭ i sychodzić da handlara narkotykami Morhana (Mahnus Krepier). Morhan miortvaj chvatkaj utrymlivaje dziaŭčynu la siabie, napampoŭvajučy jaje narkotykami. Sproby baćkoŭ (Mary Ryčardsan i Pieter Andešan) viarnuć dačku nie dajuć anijakaha plonu. Šlub i ŭsio ich žyćcio pastupova iduć pad adchon.
Dzieja trylera «Dazvol mnie ŭvajści» (2008) režysiora Tomasa Alfredsana adbyvajecca ŭ vakolicach Stakholma. Oskar, dvanaccacihadovy zapałochany chłopčyk, maryć pra pomstu. Jon zakachany ŭ dziŭnuju dziaŭčynku Eli, jakaja paźbiahaje sonca, narmalnaj ježy, a ŭ pakoj moža zajści tolki tady, kali jaje pakličuć. Eli padtrymlivaje Oskara i vučyć jaho, jak davać adpor. Adnak jak tolki Oskar razumieje, što dla taho, kab žyć, Eli patrebna čałaviečaja kroŭ, jon apynajecca pierad prablemaj vybaru. Jak mnoha moža daravać zakachany?
Fantastyčnaja drama «Štorm» (2005) režysioraŭ Bjorna Stajna i Monsa Marlinda raspaviadaje pra Dzi‑Dzi (Eryk Eryksan), samaŭpeŭnienaha maładoha čałavieka tryccaci hod. Adnojčy jon sustrakaje Łovu (Eva Rose), dziŭnuju dziaŭčynu, jakuju praśledujuć šalonyja nieznajomcy. Łova pakidaje Dzi‑Dzi skrynku, jakuju toj pavinien bierahčy. Pieraśledniki ž adstupać ni ŭ jakim razie nie žadajuć, im treba znajści Łovu, Dzi‑Dzi i atrymać skrynku. Suprać svajoj voli Dzi‑Dzi akazvajecca ŭciahnutym u baraćbu dabra i zła.
Jašče adna sučasnaja drama «Soniečny štorm» (2007) Lejfa Lindbluma pačynajecca z taho, što na padłozie ŭ carkvie dzieści na poŭnačy Šviecyi lažyć źniaviečanaje cieła čałavieka… Padčas viečaryny, jakuju arhanizavaŭ Mons (Jakab Eklund), Rebieka (Izabeła Karupka), što pracuje advakatam u padatkovaj słužbie, atrymlivaje zvanok ad Susany, žonki svajho brata. Jana raspaviadaje, što pastar Viktar byŭ zabity. Rebieka viartajecca ŭ svoj rodny horad Kirunu, kab vyratavać aryštavanuju Susanu i vyśvietlić, chto sapraŭdy vinavaty ŭ žorstkim złačynstvie.
Usie filmy demanstrujucca na movie aryhinału ź biełaruskimi subtytrami.
