Svaboda i adkaznaść. Ekanamičny rost. Niezaležnaść i Eŭraatlantyčny vybar
Šanoŭnyja suajčyńniki!
Partyja BNF idzie na prezydenckija vybary, kab abaranić karennyja intaresy biełaruskaha narodu. Partyja BNF – starejšaja palityčnaja siła Biełarusi, partyja, jakaja zaŭsiody ŭ svajoj dziejnaści kiravałasia nacyjanalnymi intaresami i nia zdradžvała svaim pryncypam.
Zaraz hramadzka-palityčnaja sytuacyja ŭnutry krainy i vykliki zvonku vymahajuć, kab na palityčnaj scenie iznoŭ prahučaŭ hołas nacyjanalna-demakratyčnych siłaŭ. Partyja BNF maje adkazy na vykliki času.
“Nacyjanalnyja intaresy vyšej za ŭsio” – voś naš pryncyp.
Na pasadzie prezydenta kandydat ad Partyi BNF zrobić usio dla realizacyi hetaha pryncypu zhodna z pałažeńniami Prahramy Partyi BNF i kaštoŭnaściami, zakładzienymi ŭ Deklaracyi Biełaruskaha Niezaležnickaha Bloku.
SVABODA I ADKAZNAŚĆ
Viartańnie da pryncypu zakonnaści i raździaleńnia ŭładaŭ – naša pieršačarhovaja zadača. Biełaruś pavinnaja stać pravavoj dziaržavaj. Heta niemahčyma biez demantažu siońniašnich pryncypaŭ ułady i kiravańnia.
- Sklikańnie Kanstytucyjnaha schodu pavinna stać srodkam vyrašeńnia pytańniaŭ pabudovy hramadzka-palityčnaha ładu volnaj i niezaležnaj Biełarusi. Partyja BNF vystupaje za pierachod ad aŭtarytarnaj systemy prezydenckaha kiravańnia da parlamenckaj respubliki. Kanstytucyjny schod raspracuje časovyja kanstytucyjnyja pałažeńni i mechanizm pryniaćcia novaj Kanstytucyi, a taksama pryznačyć Kamisiju pa pravavoj reformie i Kamisiju pa lustracyi. Na pierachodny peryjad Urad narodnaha davieru budzie sfarmavany pa pazapartyjnym pryncypie na termin da praviadzieńnia svabodnych vybaraŭ Parlamentu.
- Skaračeńnie dziaržaparatu budzie našaj pieršačarhovaj zadačaj. Karupcyja, što apanavała łukašenkaŭski režym, – heta rakavaja puchlina, što parazituje na biełaruskaj nacyi. Skidańnie jarma biurakratyi i karupcyi budzie adbyvacca adnačasova z skasavańniem orhanaŭ palityčnaha pieraśledu i specsłužbaŭ, što absłuhoŭvajuć intaresy isnaj uładnaj hrupoŭki.
- Svaboda presy budzie abaronienaja dziaržavaj. Niezaležnyja ŚMI buduć sapraŭdnaj “čaćviertaj uładaj”, jakaja dapamoža źniščyć usie prajavy karupcyi. Budzie skasavanaja dziaržaŭnaja manapolija na telebačańnie i radyjo.
- Pierahlad niedemakratyčna pryniataha zakanadaŭstva jość nadzvyčaj važnaj zadačaj. Dziela jaje vyrašeńnia Kanstytucyjnym schodam budzie stvoranaja admysłovaja Kamisija pa pravavoj reformie, jakaja paznačyć kirunki, pryjarytetnyja dla refarmavańnia. My bačym pieršačarhovymi zadačami stvareńnie zakanadaŭčych harantyjaŭ dla spraviadlivaści niezaležnaj sudovaj systemy i svabody słova.
- Złačynstvy aŭtarytarnaha režymu nie pavinnyja zastacca biez pakarańnia. My nia možam sabie dazvolić zabycca na palityčna matyvavanyja źniknieńni, źbićcio deputataŭ Parlamentu i šmatlikija fakty represijaŭ suprać volnadumcaŭ. Usie fakty parušeńnia zakonnaści musiać być raśśledavanyja abjektyŭna. Dziela hetaha budzie stvoranaja kamisija pa lustracyi z šyrokimi paŭnamoctvami i jasnym mechanizmam pieradačy nazapašanych materyjałaŭ i vynikaŭ śledztva ŭ orhany prakuratury i sud.
- Nacyjanalnaja systema abarony pravoŭ čałavieka i spraviadlivaści, jakaja ciapier adsutničaje ŭ Biełarusi, budzie stvoranaja novaabranym prezydentam u nieadkładnym paradku. Jana budzie ŭklučać u siabie niezaležny i spraviadlivy sud, upaŭnavažanaha pa pravach čałavieka. Staryja specyjalnyja słužby buduć skasavanyja, KDB budzie raspuščany, a jahonaja dziejnaść, taksama jak i dziejnaść jahonych papiarednikaŭ, raśśledavanaja Kamisijaj pa lustracyi. Novyja specyjalnyja słužby buduć stvoranyja sa specyjalistaŭ, nie zaplamlenych palityčnymi represijami.
EKANAMIČNY ROST
- Partyja BNF abiacaje zrabić usio, kab u vyniku spraviadlivaj ziamielnaj reformy pryvatnaja ŭłasnaść na ziamlu stała haspadarčym padmurkam novaj demakratyčnaj Biełarusi.
- Buduć stvoranyja volnyja ŭmovy dla raźvićcia małoha i siaredniaha pradprymalnictva.
- Mytnyja pošliny na ŭsie vidy tavaraŭ, jakija nie vyrablajucca na terytoryi Biełarusi, pavinnyja być skasavanyja.
- Ekanamičnaja intehracyja z Eŭraźviazam aznačaje dostup našaj pradukcyi na eŭrapiejskija rynki. Ale pry hetym dla našaj krainy
dla zachavańnia kankurentazdolnaści ŭ hlabalnym asiarodździ žyćciova nieabchodnaja madernizacyja ekanomiki. Łukašyzm jak vidavočna sastarełaja forma kiravańnia jość vynikam zachavańnia sastarełych formaŭ vytvorčaści. Pryjarytetam u investycyjnaj palitycy budzie pryciahnieńńnie eŭrapiejskich srodkaŭ dziela stvareńnia sučasnaj pramysłovaści i novych pracoŭnych miescaŭ.
- Ukazam novaha prezydenta budzie stvorany prazrysty i niekarumpavany paradak zaachvočvańnia zamiežnych investycyjaŭ.
- Uviadzieńnie mocnaj nacyjanalnaj valuty – talera – aryjencir dla hrašova-finansavaj palityki. Na bližejšy peryjad metaj budzie praviadzieńnie piśmiennaj i razvažlivaj hrašova-finansavaj palityki z metaj pieraadoleńnia nastupstvaŭ suśvietnaha finansava-ekanamičnaha kryzisu. Padatkavyja staŭki buduć istotna pamienšanyja.
NIEZALEŽNAŚĆ I EŬRAATLANTYČNY VYBAR
Nacyjanalnyja intaresy, a nie zacikaŭlenaści asobnych hrupovak, pavinnyja być asnovaj źniešniaj palityki dziaržavy. Biełaruś jość nieadjemnaj častkaj eŭrapiejskaj cyvilizacyi. Tamu eŭrapiejski šlach našaj krainy – heta nie pytańnie hieapalityčnaha chistańnia pamiž Maskvoj i Bruselem, a śviadomy i asensavany ŭdzieł u eŭrapiejskich strukturach u jakaści paŭnapraŭnaha zacikaŭlenaha boku.
- Pierahlad usich mižnarodnych damovaŭ, jakija nie adpaviadajuć nacyjanalnym intaresam, stanie harantyjaj niezaležnaści našaj dziaržavy. Vychad z Mytnaha sajuzu, Sajuznaj dziaržavy i padobnych utvareńniaŭ parvie łancuhi, što pryviazvajuć Biełaruś da Kramla.
- Niezaležnaść našaj krainy nia budzie tryvałaj da toj pary, pakul jana nie zabiaśpiečvajecca kulturnymi čyńnikami. Dziela ich stvareńnia pieršym ukazam novaha prezydenta budzie ukaz ab viartańni spradviečnych nacyjanalnych biełaruskich symbalaŭ – Pahoni i Śviatoha Bieł-Čyrvona-Biełaha ściahu. Druhim ukazam buduć stvoranyja dziejsnyja mechanizmy padtrymki i pašyreńnia ŭžyvańnia biełaruskaj movy. Orhany dziaržaŭnaj ułady i inšyja dziaržaŭnyja arhanizacyi pavinnyja funkcyjanavać pa-biełarusku, a zakony i inšyja narmatyŭna-pravavyja akty musiać pisacca na biełaruskaj movie.
- Enerhietyčnaja niezaležnaść jość nieabchodnaj umovaj palityčnaj niezaležnaści našaj krainy. My vystupajem za raźvićcio jak alternatyŭnaj enerhietyki i enerhaźbierahalnych technalohijaŭ, tak i dakazaŭšych svaju efektyŭnaść eŭrapiejskich padychodaŭ da raźvićcia atamnaj enerhietyki. Enerhietyčnaje supracoŭnictva ź inšymi dziaržavami musić stać alternatyvaj rasiejskamu imperyjalizmu.
- Demahrafičnaja sytuacyja, jakaja skłałasia ciapier, pahražaje niezaležnaści i samomu isnavańniu biełaruskaj nacyi. Kožnaja siamja pry ŭziaćci šlubu pavinnaja atrymlivać hrant u pamiery siaredniaha hadavoha zarobku, jakim zmoža skarystacca pry naradžeńni druhoha dzicionka. Vyrašeńnie demahrafičnaj prablemy niemahčymaje biez umacavańnia siamji. Dziela hetych metaŭ budzie zasnavany Fond budučych pakaleńniaŭ, u jaki buduć pieraviedzienyja srodki z usich prezydenckijach fondaŭ, a taksama hrošy, atrymanyja praz skasavańnie orhanaŭ palityčnanha pieraśledu.
- Dziela ratavańnia biełaruskaj nacyi ad nastupstvaŭ Čarnobylskaj katastrofy budzie nieadkładna rassakrečanaja poŭnaja i abjektyŭnaja infarmacyja ab upłyvie nastupstvaŭ Čarnobylskaj katastrofy na zdaroŭje nacyi; pryviedzienyja sanitarnyja narmatyvy, datyčnyja radyjacyjnaha zabrudžvańnia, da standartaŭ , pryniatych u EZ; palehčanaja pracedura impartu lekaŭ, nieabchodnych dla lačeńnia ankalahičnych zachvorvańniaŭ; uviedzienyja lhoty, jakija b stymulavali dabračynnuju dziejnaść, źviazanuju z arhanizacyjaj lačeńnia za miažoj i z uvozam lekaŭ i medtechniki; zabiaśpiečanaja mahčymaść rehularnych biaspłatnych abśledvańniaŭ dla vyjaŭleńnia rakavych zachvorvańniaŭ ci ryzyki rakavych zachvorvańniaŭ siarod dziaciej i padletkaŭ; pavialičanaje finansavańnie adpaviednych medyčnych ustanovaŭ ź pieranakiravańniem srodkaŭ, što siońnia vydatkoŭvajucca na finansavańnie idealahičnaj vertykali ź biudžetu krainy.
- Budzie pastaŭlenaja zasłona nielehalnaj emihracyi. Miaža z Rasiejaj budzie ustalavanaja i nadziejna ŭmacavanaja, kab zabiaśpiečvać bieśpieraškodnyja stasunki pamiž dobrasumlennymi hramadzianami, ale abaraniać Biełaruś ad kryminału.
- Novy prezydent prykładzie ŭsie namahańni dla niaŭchilnaha dałučeńnia Biełarusi da Šenhienskaj prastory. Pry hetym my vystupiem za toje, kab hramadzianie Rasiei mahli atrymlivać biełaruskija nacyjanalnyja vizy biaspłatna.
- Arhanizacyja Paŭnočnaatlantyčnaj Damovy pavinnaja stać harantam niezaležnaści našaj krainy. Heta mahčyma tolki pry paŭnavartasnym dałučeńni Biełarusi da palityčnych, a ŭ perspektyvie – i da vajskovych elementaŭ eŭraatlantyčnaj systemy biaśpieki. Ukaz ab pierahladzie vajskova-palityčnaj daktryny budzie padpisany paśla kansultacyjaŭ z asnoŭnymi palityčymi subjektami, kiraŭnictvam Ministerstva abarony i Hieneralnaha štabu, i z ulikam mierkavańniaŭ majučaha adbycca Kanstytucyjnaha schodu. My vystupajem za prafesijnaje vojska.
- Dałučeńnie Respubliki Biełaruś da Eŭrapiejskaha Źviazu musić być aryjenciram biełaruskaj źniešniaj palityki. Ale hetaje dałučeńnie mahčymaje tolki na tych umovach, jakija buduć vyhodnyja biełaruskamu narodu i buduć adpaviadać intaresam biełaruskaj dziaržavy. My nia zhodnyja pazbavicca kulturnaj admietnaści dziela karotkačasovych haspadarčych pieravahaŭ. My – za Eŭropu Ajčynaŭ!
Šanoŭnyja siabry i adnadumcy!
Dla ŭsich nas Biełaruś jość adzinaj i niepaŭtornaj Baćkaŭščynaj. Našaja ahulnaja budučynia nieparyŭna źviazanaja ź losam biełaruskaj nacyi. Razam my zdolnyja damahčysia hodnaha, svabodnaha i niezaležnaha žyćcia na biełaruskaj ziamli. Novy prezydent Biełarusi ad Partyi BNF skarystaje ŭsie prezydenckija paŭnamoctvy dla dasiahnieńnia hetaj mety.
