Zbornaja Biełarusi (hałoŭny trenier – Eduard Zankaviec) praviała 17 maja ŭ Kiolnie zaklučny svoj matč na čempijanacie śvietu pa chakiei z šajbaj u Niamieččynie, abyhraŭšy zbornuju Danii ź likam 2:1.
Užo na pieršaj chvilinie Łars Eler vyvieŭ datčanaŭ napierad,
na 37-j Andrej Staś zraŭniaŭ lik, a na 58-j chvilinie Michaił Stefanovič pastaviŭ pieramožnuju kropku. Za paŭtary chviliny da kanca sustrečy biełarusy zastalisia ŭtroch (dva vydaleńni), a za 15 siekundaŭ datčanie źniali hałkipiera i na placoŭcy było šeść palavych hulcoŭ u bieła-čyrvonych. Biełarusy vystajali.
Siońnia zbornaja Finlandyja vyjhrała ŭ zbornaj Słavakii – 5:2.
Stanovišča kamandaŭ u hrupie «Je»:
Rasija – 12 (4 hulni), Finlandyja – 9 (4), Danija – 6 (4), Biełaruś – 5 (5), Niamieččyna – 4 (4), Słavakija – 3 (4).
Zbornyja Rasii, Finlandyi i Danii zabiaśpiečyli sabie pucioŭki ŭ plej-of. Apošni ŭładalnik pucioŭki vyznačycca ŭ aŭtorak u hulni Niamieččyna – Słavakija.
Niahledziačy na toje, što pakul biełarusy ŭźnialisia na 4-je miesca, u aŭtorak jany jaho sastupiać jakraz pieramožcu matču Niamieččyna – Słavakija.
I taksama niahladziečy na vynik taho matču my zastaniemsia na 5-m miescy ŭ hrupie i, jak vynik, zajmajem 10-je miesca na čempijanacie śvietu. Bo ŭ hrupie F kamanda, što zojmie 5-je miesca, maje bałaŭ bolš za nas (šeść).
***
Na čempijanacie śvietu pa chakiei zbornaja Biełarusi zhulała šeść matčaŭ, try hulni vyjhrała, try prajhrała.
Na papiarednim etapie Biełaruś vyjhrała ŭ Kazachstana (5:2), prajhrała Słavakii (2:4) i Rasii (1:3). U kvalifikacyjnaj hrupie «Je» vyjhrała ŭ aviertajmie ŭ Niamieččyny – 2:1, u asnoŭny čas u Danii – 2:1 i prajhrała Finlandyi (0:2).
Na čempijanacie śvietu pa chakiei ŭ 2009 hodzie zbornaja Biełarusi (joj kiravaŭ Hlen Chenłan) prabiłasia ŭ čverćfinał i zaniała vynikovaje 8-je miesca. Najlepšy vynik na čempijanatach – ČS u 2006 hodzie ŭ Ryzie – 6-je miesca (znoŭ našaj družynaj kiravaŭ Chenłan).
Pad kiraŭnictvam Kurta Frejziera ŭ 2007 i 2008 hadach biełaruskija chakieisty zajmali 11-je i 9-je miescy.
