Płanujecca, što ŭ mai 2012 hoda na Zasłaŭskim vadaschoviščy pad Minskam adkryjecca Centr parusnaha sportu, jaki budzie adpaviadać usim suśvietnym patrabavańniam.
Pra heta 12 maja paviedamiŭ žurnalistam staršynia fiederacyi, kiraŭnik pahranviedamstva Biełarusi Ihar Račkoŭski.
Pavodle jaho słoŭ, u adpaviednaści z daručeńniem prezidenta ŭ 2010 hodzie budzie padrychtavana prajektna‑kaštarysnaja dakumientacyja budaŭnictva, u 2011 hodzie pačnucca raboty. Ich košt aceńvajecca ŭ 3—5 młn. jeŭra. Inviestycyjny prajekt užo padrychtavany. Centr budzie pabudavany na bazie dziejnaj dziciača‑iunackaj škoły. Na hetaj placoŭcy raźmieściacca jak sama škoła, tak i ofis Biełaruskaj fiederacyi parusnaha sportu, anhary dla sudnaŭ, hatel dla spartsmienaŭ i šerah inšych abjektaŭ.
Za ŭzor pry budaŭnictvie Centra parusnaha sportu ŭziaty adzin z elitnych jacht‑kłubaŭ u Padmaskoŭi, skazaŭ Ihar Račkoŭski.
Jon paviedamiŭ, što ŭ najbližejšych płanach fiederacyi taksama rekanstrukcyja Respublikanskaha centra alimpijskaj padrychtoŭki, jaki znachodzicca na Zasłaŭskim vadaschoviščy i budaŭnictva Škoły parusnaha sportu ŭ Hrodnie.
Ihar Račkoŭski padkreśliŭ, što na ŭsie hetyja raboty nie płanujecca pryciahvać biudžetnyja srodki. Pavodle jaho słoŭ, fiederacyja sama maje namier zaniacca haspadarčaj dziejnaściu i zarablać srodki. Jana taksama raźličvaje na svajho hienieralnaha sponsara STAA «Dyjanis».
