Pa-biełarusku vyjšła pieršaja apovieść pra mumitrolaŭ «Maleńkija troli i vialikaja pavodka».
Mumitrol, Snusmumryk, Chatyfnaty… Biełaruskaja pierakładčyca pieršaj apovieści pra mumitrolaŭ «Maleńkija troli i vialikaja pavodka» Nasta Łabada nahadvaje, što ŭ suśvietnaj litaratury niašmat piśmieńnikaŭ, jakija stvaryli jaskravy, ale całkam adasobleny śviet sa svaimi ŭłasnymi zakonami i nasielnikami, dy siarod ich Tuve Jansan — na pačesnym miescy. Aŭtarka 8 apovieściaŭ pra mumitrolaŭ, siarod jakich suśvietna viadomyja — «Kamieta ŭ Mumi-krainie» i «Čaroŭny kapialuš», šviedskamoŭnaja piśmieńnica ź Finlandyi Tuve Jansan napisała za svajo žyćcio taksama kolki tvoraŭ dla darosłych i dziaciej, ale sapraŭdnuju papularnaść joj prynieśli mienavita pryjaznyja, padobnyja da maleńkich biehiemocikaŭ istoty.
Rukapis «Maleńkich trolaŭ i vialikaj pavodki» (data vychadu ŭ śviet – 1945) pralažaŭ u šufladzie niekalki hadoŭ i byŭ vydadzieny tolki paśla taho, jak siabry paraili Tuve zrabić dla apovieści ilustracyi, kab vobraz siamji Mumitrolaŭ atrymaŭ svajo zavieršanaje ŭvasableńnie. U adroźnieńnie ad «Kamiety», napisanaj padčas Druhoj suśvietnaj, «Pavodka» nie poŭnicca zmročnymi vobrazami i trahičnym śvietapryniaćciem. A siužet «Pavodki», dzie Mumitrol i Mumi-mama šukajuć źnikłaha baćku, pryvodzić adno da ščaślivaj raźviazki.
 |
«My niejak tak pryvykli, što ŭ kazkach jość stanoŭčyja i admoŭnyja hieroi, pryčym stanoŭčyja advažna zmahajucca z admoŭnymi, — dadaje Nasta Łabada. — A Tuve Jansan adrazu, ź pieršaj knihi pra mumitrolaŭ, kaža, što jaje hałoŭnyja hieroi — maleńkija i słabyja. Adnak, jak vyśviatlajecca, taja maleča zdolnaja dać rady ciažkim abstavinam žyćcia dziakujučy svajoj dabryni».
Na siońniašni dzień knihi pra mumitrolaŭ — nacyjanalny honar Finlandyi i Šviecyi. U Finlandyi im pryśviečany dziciačy mumipark, vyjavy hetych abajalnych hierojaŭ možna znajści na manietach, markach i vinšavalnych paštoŭkach.
Pahladzieć i nabyć knihu «Maleńkija troli i vialikaja pavodka» možna budzie 16 traŭnia ŭ minskaj biblijatecy A.S. Puškina. Prezientacyja — najpierš dziciačaja. Padčas jaje adbudziecca viktaryna z darunkami dla dziaciej. Akramia taho, achvočym dzietkam mastak namaluje mumihierojaŭ na pavietranych šarykach. Prahučać miksy na dziciačyja šviedskija pieśni ŭ vykanańni Ŭładzisłava Bubiena. I aproč usiaho, tam buduć ekspanavacca malunki amataraŭ mumitrolaŭ ź Biełarusi i Rasii.
Viadoŭca imprezy — Anka Upała. Pierad publikaj, akramia pierakładčycy Nasty Łabady, vystupiać šviedski ambasadar Stefan Eryksan, paety Andrej Chadanovič i Viktar Žybul dy inš. Pačatak a 16-j. Prychodźcie ź dzietkami!
