Miascovy Astap Bender padmanuŭ słuččakoŭ na 340 miljonaŭ rubloŭ.
Machlar, jakomu moh by pazajzdrościć hieroj, prasłaŭleny Ilfam i Piatrovym, zbudavaŭ finansavuju piramidu, jakaja dazvalała jamu niabiedna žyć i prajhravać hrošy ŭ kazino.
Słucki pradprymalnik pazyčaŭ hrošy ŭ znajomych, abiacajučy viarnuć z pracentami. Niekatorym pazyki viartaŭ, zajmajučy hrošy ŭ inšych biźniesmienaŭ. Samaja bujnaja suma, jakuju padsudny zaniaŭ u znajomaha, — 25 tysiač dalaraŭ.
Akramia taho, pradprymalnik braŭ zamovy na ramont, restaŭracyju i vyrab miakkaj i korpusnaj mebli. Klijentaŭ jon znachodziŭ pa ŭsioj krainie, raźmiaščajučy abjavy ŭ miascovaj presie. Ludzi addavali stopracentnuju pieradapłatu, ale ni mebli, ni hrošaj bolš nie bačyli.
Čas ad času da pradprymalnika źviartalisia znajomyja z prośbaj dapamahčy pradać aŭtamabil. Hrošy ad prodažu aŭto machlar prysabiečvaŭ, a klijentaŭ karmiŭ abiacańniami addać paźniej.
Nieŭzabavie ŭ milicyju pasypalisia zajavy ad padmanutych hramadzian. 81 kryminalnaja sprava była abjadnanaja ŭ adnu, i da momantu vyniasieńnia prysudu sudom Słuckaha rajona ŭ joj naličvałasia 11 tamoŭ. Sud razhladaŭ kryminalnuju spravu na praciahu piaci miesiacaŭ.
Pa słovach Siarhieja Šaravarava, pamočnika prakurora prakuratury Słuckaha rajona, maci padsudnaha prychodziła na kožnaje pasiadžeńnie suda i pradjaŭlała papierki ab apłacie pazykaŭ syna. Žančyna skłała śpis usich paciarpiełych, jakim adpraŭlała hrošy sa svajoj piensii, pakidajučy sabie na samaje nieabchodnaje.
Jak paviedamiła karespandentu «Kurjera» sudździa Julija Paŭlenka, 24 sakavika sud Słuckaha rajona pryznaŭ pradprymalnika vinavatym u ździajśnieńni machlarstva ŭ asabliva bujnym pamiery (č.4 art. 209 KK). Jaho prysudzili da siami hadoŭ pazbaŭleńnia voli z nakiravańniem u papraŭčaj kałonii va ŭmovach uzmocnienaha režymu. Zhodna z rašeńniem suda, usie majomaść biźniesoŭca budzie kanfiskavana. Hrošy, atrymanyja ad jaho prodažu, atrymajuć paciarpiełyja, jakija vystavili pazovy ab kampiensacyi materyjalnaj i maralnaj škody.
Prysud ustupić u siłu praz 10 dzion paśla vyniasieńnia.
