11 sakavika ŭ minskim kaściole Uzvyšeńnia Śviatoha Kryža na Kalvaryi adbudziecca śviataja Imša i malitva padziaki z nahody 20‑hodździa adnaŭleńnia dziejnaści Hreka‑katalickaj Carkvy ŭ Biełarusi. 20 hod tamu,
11 sakavika 1990 h., mitraforny protaijerej Alaksandr Nadsan, Apostalski Vizitatar dla biełarusaŭ zamiežža i rektar Biełaruskaj katalickaj misii ŭ Łondanie (Vialikabrytanija), celebravaŭ u adzinym u toj čas u Minsku kaściole na Kalvaryi liturhiju pa vizantyjskim abradzie na biełaruskaj movie.
Heta była pieršaja adkrytaja hreka‑katalickaja liturhija ŭ paślavajennaj Biełarusi.
Na nabaženstva pryjšli sotni ludziej. Hetaja liturhija stała momantam adnaŭleńnia adkrytaj liturhičnaj i dušpastyrskaj dziejnaści Hreka‑katalickaj Carkvy ŭ Biełarusi. Z taho času biełaruskija hreka‑katoliki ličać svaim asablivym paklikańniem i pryvilejem malicca na rodnaj movie. Padčas kožnaj liturhii ŭ chramach, kaplicach i inšych miescach malitvy paŭtarajucca słovy: «Za Boham ścieražonuju krainu našu Biełaruś i ŭvieś biełaruski narod, za stojkaść u viery, mužnaść u vyprabavańniach i viernaść svajmu narodu ŭsich nas Hospadu pamolimsia».
«Jubilej 20‑hodździa hetaj padziei śviatkujecca ŭ pieryjad Vialikaha postu i tamu adznačajecca ŭ hłybokaj malitoŭnaj zadumie. Biełaruskija hreka-katoliki dziakujuć Hospadu, što Carkva, jakaja nikoli nie pierastavała isnavać, atrymała mahčymaść adkryta abviaščać Jevanhielle ŭ rodnaj ziamli», — adznačyŭ dekan minskich hreka‑katalickich parafij a. Jaŭhien Usošyn.
U hreka‑katalickich parafijach Minska śviatyja Imšy z malitvaj padziaki adbuducca ŭ niadzielu, 14 sakavika.
