 "Uładar bury": 6 "Oskraŭ" |
Vajennaja drama pra dziejańni amierykanskich sałdat u Iraku «Uładar bury» pryznanaja najlepšym filmam 2009 hodu. Džef Brydžys — najlepšy aktor hodu, Sandra Bałak — najlepšaja aktorka. U Łos-Anželesie adbyłasia 82-aja cyrymonii ŭručeńnia pryzoŭ amierykanskaj kinaakademii «Oskar».
Cyrymoniju adkryli 64-hadovy Styŭ Martyn i 51-hadovy Alek Bołduin i adrazu prajšlisia pa Merył Stryp, adnoj z udzielnic cyrymonii, jakaja naminavałasia na «Oskara» 16 razoŭ, a dastavaŭsia jon joj tolki dvojčy.
Potym byŭ abvieščany najlepšy aktor druhoha płanu. Hetuju naminacyju dastaŭ jašče zusim niadaŭna nieviadomy aŭstryjski aktor Krystaf Valc, jaki hrateskna, ale adhetul nie mienš bliskuča vyjaviŭ kryvažernaha nacysckaha pałkoŭnika, palaŭničaha na habrejaŭ, u kinamanskaj fantazii Kviencina Taranciny «Biassłaŭnyja bajstruki». Najlepšaja aktorka druhoha płanu — aktrysa Monik, jakaja hraje žančynu, žycharku murynskaha hieta, što za asabistyja niaŭdačy beścić i prynižaje svaju ciažarnuju dačku (drama «Vyžylvajsia»).
 Džef Brydžys |
Najlepšym paŭnamietražnym multfilmam na cyrymonii była pryznanaja stužka vytvorčaści kankurenta «Dysneju» kampanii «Piksar» — «Uhoru», ščymlivaja historyja dla dziaciej i darosłych pra toje, jak važna spraŭdžvać mary. Adzin sa stvaralnikaŭ hetaha multfilma, kampazitar Majkł Džakina, taksama atrymaŭ hanarovuju statuetku za najlepšuju muzyčnuju darožku da filma.
Najlepšym dakumientalnym filmam byŭ nazvany film Łui Sihojsa «Buchta», jakoje vykryvaje drapiežnaje palavańnie na delfinaŭ u Japonii.
Biełaruski śled. U naminacyi «Najlepšy koratkamietražny mastacki film» vyjhrała niamieckaja stužka «Novyja žychary». Na hetaje zvańnie taksama pretendavaŭ (i jak my bačyli biespaśpiachova) irłandski film Chuanity Ŭiłsan «Dźviery», jaki źniaty pavodle apaviadańnia Śviatłany Aleksijevič i raskazvaje pra nastupstva Čarnobylskaj trahiedyi.
Džef Brydžes dastaŭ najlepšaha aktora za rolu stałaha ałkaholika, vykanaŭcy kantry, jaki dziakujučy kachańniu vynachodzić svoj śviet nanava (drama «Šalonaje serca»). Sandra Bałak — najlepšaja aktorka pavodle amierykanskaj kinaakademii za rolu pryjomnaj maci, jakaja zmahajecca za svajho čornaskuraha pasynka (sacyjalnaja drama «Niabačny bok»).
 Sandra Bałak |
Najlepšuju režysiorku atrymała Ketryn Behiłou za vajennuju dramu «Uładar bury». U dadatak jana zrabiłasia pieršaj žančynaj u historyi Halivudu, jakaja dastała hetaje zvańnie. Usiaho stužka, jakaja sabrała ŭ prakacie ŭsiaho tolki 11 miljonaŭ dalaraŭ, atrymała 6 oskaraŭskich uznaharodaŭ, uklučajučy samuju prestyžnuju «Najlepšaja stužka». Padčas atrymańnia ŭznaharodaŭ stvaralniki paabiacali, što zapuściać svoj film u prakat jašče raz.
A «Avatar»?! Stvaralniki «Avatar» atrymali pryz za «najlepšuju apieratarskuju pracu» (Mauro Fijory), «Najlepšyja admysłovyja efiekty», «Najlepšy praca mastaka». I miljardy ŭ prakacie, viadoma.
Cyrymoniju ŭručeńnia ŭpieršyniu ŭ žyvym efiry pakazvała BT ź sinchronnym pierakładam na rasijskuju.
