Z 5-ha krasavika ŭ siłu ŭstupaje novy vizavy kodeks ES (Community Code on Visas). Jon pavinien uparadkavać i unifikavać patrabavańni i praviły vydačy viz hramadzianam krain, jakija žadajuć ŭjechać na terytoryju Jeŭrapiejskaha Sajuza. Z tekstam dakumienta možna aznajomicca tut (pa-anhlijsku).
Novy kodeks budzie datyčyć viz, vydadzienych na prava tranzitu abo prysutnaści ŭ krainach Šenhienskaha pahadnieńnia. Novaŭviadzieńni nie zakranuć pytańniaŭ atrymańnia dazvołu na žycharstva i inšych doŭhaterminovych dazvołaŭ na znachodžańnie.
U dakumiencie zamacoŭvajecca patrabavańnie asabistaj prysutnaści pry padačy dakumientaŭ na pieršuju vizu.Heta źviazana z rašeńniem ES ab uviadzieńni bijamietryčnaj identyfikacyi u ahulnaj infarmacyjnaj sistemie Jeŭrasajuza. Kali raniej dazvalałasia padača dakumientaŭ dla atrymańnia vizy bližejšymi rodnymi, to zaraz heta stanie niemahčyma. Prynamsi, padčas pieršaha vizitu ŭ konsulstva krainy ES.
Padčas pieršaj padačy zajavy konsulstva pavinny ŭziać adbitki palcaŭ, ale kali takija adbitki ŭžo bralisia ŭ apošnija 59 miesiacaŭ, to ich abaviazany ŭziać ź vizavaj infarmacyjnaj sistemy. Zrešty, konsulstvy atrymajuć prava abhruntavana padazravać prośbita i patrabavać u jaho adbitki palcaŭ u luby čas, Ad pracedury padačy adbitkaŭ palcaŭ buduć vyzvalenyja dzieci da 12 hadoŭ. Zachavać svaje palcy ŭ čyścini padčas vizitu ŭ konsulstva krainy ES zmohuć taksama členy aficyjnych delehacyj i kiraŭniki dziaržaŭ i ŭradaŭ, razam sa svaimi siamiejnymi, jakija źbirajucca na aficyjny vizit pa zaprašeńniu ŭrada adpaviednaj krainy
Pry hetym, u novym dakumiencie praduhledžanyja pracedury šyfravańnia, zachoŭvańnia i źniščeńnia asabistych dadzienych pa patrabavańniu asoby, što atrymała vizu.
Taksama płanujecca stvaryć internet-resurs, na jakim budzie raźmieščanaja samaja poŭnaja infarmacyja, što datyčyć atrymańnia viz u krainy Šenhienskaha pahadnieńnia. Taki krok moža značna ablehčyć atrymańnie nieabchodnaj infarmacyi. Dahetul davodziłasia źviazvacca z konsulstvami krain ES.
Padača dakumientaŭ na vizu pavinna adbyvacca nie raniej čym za try miesiacy da pajezdki. U vypadku prośby ab padaŭžeńni terminu dziejańnia vizy – nie raniej, čym za šeść miesiacaŭ da jaje zakančeńnia.
Pavodle novaha vizavaha kodeksa, pašpart pavinien być sapraŭdny minimum 3 miesiacy paśla čakanaj daty vyjezdu z zony Šenhien, mieć minimum dźvie čystych staronki, a taksama pavinien być vydadzieny na praciahu apošnich 10 hadoŭ da padačy zajavy.Takoje patrabavańnie tłumačycca nieabchodnaściu zachavańnia biaśpieki na avijalinijach. Na novaŭviadzieńnie varta źviarnuć asablivuju ŭvahu. Termin dziejańnia biełaruskich pašpartoŭ ŭ bolšaści vypadkaŭ pieravyšaje 10 hadoŭ u suviazi z čym u biełaruskich hramadzian mohuć uźnikać prablemy pry atrymańni viz.
Novy vizavy kodeks ustanaŭlivaje košt viz pamieram u € 60 dla ŭsich, chto starejšy za 12 hadoŭ i €35 dla dziaciej ad 6 da 12 hadoŭ. Dzieci da 6 hadoŭ zmohuć atrymać vizu biaspłatna. Kankretnych umoŭ vydačy biaspłatnych viz u kodeksie nie praduhledžana. Damoŭlenaści pamiž krainami ab źnižeńni koštu viz zastajucca ŭ sile, adnak Biełarusi toje nie datyčyć. Prynamsi, pakul.
Taksama novy dakumient praduhledžvaje maksimalny pamier apłaty pasłuh vizavych centraŭ – € 30. Raniej košt pasłuh (naprykład, za paskareńnie vydačy vizy), moh značna pieravyšać hetuju ličbu.
Novaŭviadzieńni pačnuć dziejničać ad 5-ha krasavika dla atrymańnia viz va ŭsie krainy Šenhienu, akramia Danii. Jana pakul nie budzie ŭžyvać ahulny vizavy kodeks, ale pavinna na praciahu šaści miesiacaŭ adaptavać svajo nacyjanalnaje zakanadaŭstva ŭ adpaviednaści ź im. Isłandyja, Narviehija, Lichtenštejn i Šviejcaryja buduć kiravacca hetym dakumientam, jak napramkam raźvićcia svaich adnosin z Šenhienskim dahavoram. Vialikabrytanija i Irłandyja nie płanujuć źmianiać praceduru vydačy viz.
