Ministr abarony Šviecyi Poł Jonsan padčas pres-kanfierencyi. Skryn videa gp.se
Jak piša šviedskaje vydańnie Dagens Nyheter, Šviecyja nadaść Ukrainie pakiet vajskovaj dapamohi na sumu 7,1 miljarda šviedskich kron (kala 700 miljonaŭ dołaraŭ). Jon stanie samym vialikim paśla napadu Rasii.
Bolšuju častku pakieta dapamohi składajuć novyja artyleryjskija bojeprypasy, jakich ukrainskamu boku vielmi brakuje. Akramia hetaha, Kijevu pieradaduć 10 bajavych desantnych kataraŭ kłasu 90N i 20 desantnych kataraŭ kłasu G, miny i tarpiedy.
Šviedski bajavy desantny katar kłasu 90N. Fota: Wikimedia Commons
Pakiet taksama ŭklučaje šviedskija pieranosnyja rakietnyja kompleksy 70-j madeli z bojeprypasami dla paražeńnia pavietranych celaŭ, supraćtankavyja robaty, hranatamioty Carl Gustaf, ručnyja hranaty, miedycynskaje abstalavańnie i aŭtamabili, charčpajki.
Ukraina atrymaje 1 miljard kron na nabyćcio vajskovaj techniki praz roznyja fondy, a taksama 1 miljard na zamovu bajavych mašyn piachoty Stridsfordon 90.
Akramia hetaha na roznyja adukacyjnyja inicyjatyvy dla ŭkraincaŭ budzie vydatkavana 400 miljonaŭ šviedskich kron.
Ministr abarony Šviecyi Poł Jonsan (Pål Jonson) na pres-kanfierencyi 20 lutaha zajaviŭ: «Padtrymlivajučy Ukrainu, my inviestujem u našu biaśpieku. Kali b Rasija pieramahła, u nas byli b značna bolšyja prablemy ź biaśpiekaj, čym siońnia».
Razam z papiarednimi 14 pakietami šviedskaja dapamoha Ukrainie składaje amal 30 miljardaŭ šviedskich kron (2,9 młrd dołaraŭ).
Čytajcie jašče:
ES praviadzie aŭdyt dapamohi Ukrainie
Sienat ZŠA padtrymaŭ zakonaprajekt ab dapamozie Ukrainie, Izrailu i Tajvaniu na 95 miljardaŭ dalaraŭ
