Siarhiej Kavalenka. Fota Sieržuka Sierabro
Pra heta raspavioŭ dziažurny Kastryčnickaha RAUS Viciebsku, kudy dastavili zatrymanaha.
Kab daviedacca pra los zatrymanaha, jaki zamacavaŭ bieł-čyrvona-bieły ściah na hałoŭnaj haradzkoj jołcy na płoščy Pieramohi, viciebski apazycyjaner Barys Chamajda pajechaŭ u milicejski pastarunak. Dziažurny milicyjant paviedamiŭ, što ŭ ich utrymlivajecca siabar KCHP BNF Siarhiej Kavalenka, i supracoŭniki milicyi majuć namier raspačać suprać apazycyjanera kryminalnuju spravu za chulihanstva.
Dziažurny paabiacaŭ, što pieradaść zatrymanamu charčovuju pieradaču, jakuju padrychtavaŭ Barys Chamajda. Pakul Siarhieja Kavalenku dapytvajuć śledčyja, i da 11 studzienia jon budzie znachodzicca ŭ izalatary časovaha ŭtrymańnia. Potym dalejšy los chłopca maje vyrašyć prakuratura — ci raspačynać kryminalnuju, ci tolki administracyjnuju spravu za ŭčynak, jaki milicyjanty kvalifikujuć jak chulihanstva.
7 studzienia apoŭdni na vieršalinie hałoŭnaj haradzkoj jołki na płoščy Pieramohi ŭ Viciebsku źjaviŭsia bieł-čyrvona-bieły ściah. Na vačoch u socień haradžan, jakija pryjšli kancert mastackaj samadziejnaści ci na katok, ściah źniali supracoŭniki MNS, uźniaŭšysia na vyšyniu kala 40 metraŭ z dapamohaj admysłovaj pažarnaj mašyny ź leśvicaj. Siarhieja Kavalenku, jaki vyviesiŭ ściah, zatrymali milicyjanty. Ź milicejskaj mašyny jon paśpieŭ patelefanavać žurnalistam dy paviedamić, što ściah uźniaty ŭ honar śviata Božaha Naradžeńnia. Pra toje, što jon zatrymany, jamu skazać užo nie dazvolili.
Siarhieja Kavalenku ŭžo nieadnarazova zatrymlivali za akcyi ź bieł-čyrvona-biełymi ściahami dy karali štrafami i aryštami. Barys Chamajda niepakoicca, što hetam razam maładoha aktyvista pakarajuć bolš stroha jak raniej: śviatkavańnie na płoščy pieramohi ŭ abłasnym centry adbyvajecca sioleta ŭpieršyniu i da taho ž pavodle inicyjatyvy staršyni viciebskaha abłvykankamu Alaksandra Kosinca. Mienavita jon zahadaŭ ustalavać na płoščy hałoŭnuju haradzkuju jołku, na jakoj siońnia źjaviŭsia nacyjanalny ściah.
