Čynoŭniki ŭ Białyničach adznačajuć Dzień ściaha. Samaja vysokaja ŭ centry — staršynia rajvykankama Volha Prystromskaja. Fota: tielehram-kanał «Novosti Biełyničiej»
Hałoŭnyja ŭračystaci prachodzili ŭ abłasnych centrach. Na ich, jak vodzicca, pradpryjemstvy i arhanizacyi rekrutavali ŭdzielnikaŭ, jakija mielisia źjavicca sa ściahami.
U Mahilovie da hetaha dnia prymierkavali adkryćcio adramantavanaj vulicy Kamsamolskaj. Tralejbusam pa joj prajechała kiraŭnictva harvykankama i abłvykankama. Staršynia abłasnoj viertykali Anatol Isačanka i haradski kiraŭnik Alaksandr Studnieŭ byli biez halštukaŭ.
Anatol Isačanka (sprava la akna tralejbusa), pobač ź im Alaksandr Studnieŭ. Na piarednim płanie — staršynia haradskoha Savieta deputataŭ Maksim Huryn. Usie biez halštukaŭ. Fota: hazieta Mahiloŭskaha rajvykankama «Prydniaproŭskaja niva»
Ramont vulicy vydaŭsia skandalnym, bo darožniki źniščyli staruju brukavanku na joj.
Bruk, vyjaŭleny padčas rabot na Kamsamolskaj vulicy. Fota: telehram-kanał Aktahon
Uskładać kvietki da miemaryjała «Baraćbitam za savieckuju ŭładu» mahiloŭskija čynoŭniki pryjšli pry halštukach. Płošča Słavy, dzie adbyłasia asnoŭnaja ŭračystaść, patanała ŭ čyrvona-zialonym. U pieršych šerahach była milicyja.
Uskładać kvietki da miemaryjała «Baraćbitam za savieckuju ŭładu» čynoŭniki pryjšli pry halštukach. Fota: telekanał «Biełaruś 4 Mahiloŭ»
U Škłovie Dzień dziaržaŭnaha ściaha adznačyli biez asablivaha pafasu. Da aficyjnaj daty praviali viełaprabieh. Staršyni rajvykankama Andreja Kamko, jak vyhladaje z publikacyj praŭładnych miedyja, na ŭračystaściach nie było.
Ścipłaja impreza na małoj radzimie Łukašenki. Namieśnik staršyni rajvykankama Alaksandr Davydovič u zavialikim kaściumie. Fota: hazieta Škłoŭskaha rajvykankama «Udarny front»
Bukiet z troch hvaździkoŭ da pomnika palehłym u Druhuju suśvietnuju vajnu ŭskładaŭ namieśnik staršyni Škłoŭskaha rajvykankama Alaksandr Davydovič. Na čynoŭniku byŭ zavialiki dla jaho kaściumny harnitur. Pobač ź im była žančyna ŭ majcy z nadpisam «Lubimuju nie otdajut».
Na ŭračystaściach u Białyničach. Fota: tielehram-kanał «Novosti Biełyničiej»
Najbolš kreatyŭnymi na Mahiloŭščynie byli čynoŭniki ŭ Białyničach. Dla ich pašyli čyrvona-zialonyja stroi.
Staršynia rajvykankama Volha Prystromskaja (u centry). Fota: tielehram-kanał «Novosti Biełyničiej»
U taki była apranuta i staršynia rajvykankama Volha Prystromskaja. Jana vinšavała ŭ im pieramožcaŭ spartovaha zabiehu, prymierkavanaha da aficyjnaj daty.
U Horkach zładzili vajskovy parad. Jaho ŭdzielnikami byli achoŭniki miascovaj kałonii i lačebna-pracoŭnaha prafiłaktoryja dla žančyn.
Uračystaść u Horkach. Staršynia rajvykankama Michaił Huły i achoŭniki horackaj kałonii №9. Fota: hazieta «Horacki vieśnik»
Staršynia rajvykankama Michaił Huły vystupaŭ na fonie traich vajskoŭcaŭ.
U Kryčavie adznačać Dzień ściaha sabrali apranutuju ŭ military moładź.
Na ŭračystaści ŭ Kryčavie moładź apranuli ŭ military. Fota: krichevlive.by
Staršynia Kryčaŭskaha rajvykankama Andrej Siedukoŭ u strohim kaściumie razam z padnačalenymi razdavaŭ paśviedčańni novym členam BRSM. Tyja ŭ adkaz prysiahali na viernaść «dziaržaŭnym simvałam Biełarusi».
Staršynia Kryčaŭskaha rajvykankama Andrej Siedukoŭ. Fota: krichevlive.by
Sioleta ŭpieršyniu ŭłady adznačajuć Dzień ściaha, hierba i himna Respubliki Biełaruś. Da 12 krasavika 2023 hoda heta data była pryśviečana tolki hierbu i ściahu.
Adznačajuć hety dzień u pamiać pra refierendum 14 maja 1995 hoda, pa vynikach jakoha byli admienienyja nacyjanalnyja simvały Biełarusi — bieła-čyrvona-bieły ściah i hierb «Pahonia» — i ŭviedzienyja sučasnyja. Pra himn na tym refierendumie havorki nie viałosia.
Dzień ściaha, hierba, a ciapier i himna adznačajuć štohod u druhuju niadzielu maja. Sioleta na im nie vystupiŭ Łukašenka. Jon nie źjaŭlajecca na publicy ad 9 maja.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
U Dziarždumie paćvierdzili infarmacyju ab prablemach sa zdaroŭjem u Łukašenki
Łukašenka biare ŭdzieł u Paradzie Pieramohi na Krasnaj płoščy FOTA
jany z hoładu puchnuć?