Mahčyma, rankam Alaksandr Łukašenka naviedaje Maskvu, dzie adbudziecca parad na Krasnaj płoščy.
Raniej mierkavałasia, što kampaniju Pucinu tam składzie tolki prezident Kyrhyzstana Sadyr Žaparaŭ. Adnak učora Maskva zajaviła, što zaprasiła na ŭračystaści prezidentaŭ Tadžykistana i Turkmienistana, a siońnia stała viadoma, što ŭ Maskvu prybuduć i kiraŭniki Kazachstana Kasym-Žamart Takajeŭ i Armienii Nikoł Pašynian.
U apošniaje dziesiacihodździe Alaksandr Łukašenka redka byvaŭ na Dzień Pieramohi ŭ Maskvie.
Adnak sioleta prysutnaść sajuźnikaŭ važnaja Uładzimiru Pucinu va ŭmovach, kali rasijskija vojski va Ukrainie buksujuć i na hetym fonie pačalisia publičnyja zvadki miž jaho siłavikami. 3 maja bieśpiłotniki ŭzarvalisia kala fłahštoka rezidencyi prezidenta ŭ Kramli.
Postsavieckija dyktatary vykarystoŭvajuć pieramohu ŭ Druhoj suśvietnaj vajnie dla apraŭdańnia svajho procistajańnia z Zachadam i pretenzij na asablivuju rolu.
Nacysckaja Hiermanija kapitulavała 78 hadoŭ nazad, poźnim viečaram 8 maja. U SSSR pra zakančeńnie vajny stała viadoma 9 maja, hetaja data i stała śviatočnaj. U pieršyja dziesiacihodździ paśla vajny hety dzień śviatkavali ścipła, z časam jon staŭ usio bolš pampieznym. Ciapier, kali vieteranaŭ amal nie zastałosia, ź jaho źlapili ceły kult z raznastajnymi rytuałami.
Na šeście z uskładańniem kvietak «Biełaruś pamiataje», u pryvatnaści, štohod u peŭny čas zhaniajuć pracoŭnych i navučencaŭ.
U krainach Jeŭrapiejskaha sajuza 9 maja adznačajecca Dzień Jeŭropy. Ideja hetaha śviata — kab pamiać pra vajnu nahadvała ludziam pra važnaść miru i adzinstva jeŭrapiejskich narodaŭ, jakija zdoleli pražyć amal vosiem dziasiatkaŭ hadoŭ biez vojnaŭ.
Čytajcie taksama:
Pašynian lacić na Parad Pieramohi ŭ Maskvu
Takajeŭ taksama lacić u Maskvu na Parad Pieramohi
Pucin pavinšavaŭ kiraŭnikoŭ krain SND z Dniom Pieramohi. Aproč dźviuch krain
