Adno z apošnich fota Mikałaja Klimoviča ŭ fejsbuku
Mikałaju Klimoviču byŭ 61 hod. Kali vieryć sacsietkam mužčyny, jon skončyŭ Minski «kultaśviet» (ciapier — Minski dziaržaŭny kaledž mastactvaŭ) u 1982 hodzie i pačaŭ pracavać mastackim kiraŭnikom Lemiaševickaha sielskaha Doma kultury. Potym pierajšoŭ na pracu zahadčykam inšaha doma kultury i zahadčykam kaviarni «Dyjałoh».
Pastupiŭ u Maskoŭski dziaržaŭny ŭniviersitet kultury i mastactvaŭ u 1986-m. U hety čas žyŭ u Maskvie, pracujučy siam-tam na pasadach administratara dziciačaj pieradačy, cyrka.
U 1994-m viartajecca ŭ Pinsk i pačynaje supracoŭničać z roznymi miedyja, a taksama ŭstupaje ŭ BNF. Z taho času mužčyna doŭha na adnoj pracy nie zatrymlivaŭsia i za hod moh pamianiać ich ź piatok. Apošniaje viadomaje miesca pracy Mikałaja — rasklejščyk abjaŭ u 2013 hodzie.
Partyjny bilet BNF Mikałaja Klimoviča. Fota: 1reg.org
Nieviadoma dakładna, kali Klimovič zacikaviŭsia hramadska-palityčnym žyćciom, ale ŭ 2001 hodzie jon uvachodziŭ u inicyjatyŭnuju hrupu pa stvareńni respublikanskaha hramadskaha abjadnańnia «Pravavaja abarona hramadzian». Siarod stvaralnikaŭ byŭ taksama pravaabaronca Aleh Vołčak. Abjadnańnie nie zarehistravali, a stvaralniki paśla vyjhrali sud AAN.
Mikałaj Klimovič padčas stvareńnia «Pravavoj abarony hramadzian» u 2001 hodzie
U 2009-m Mikałaj Klimovič pačynaje vieści błoh u «Žyvym žurnale» pad psieŭdanimam Mikałaj Vierasień. Tam jon pisaŭ pra svaje byłyja podźvihi i raspaviadaŭ pra žyćcio ŭ Pinsku.
Pieryjadyčna pra jaho pisali miedyja: da prykładu, u 2013 hodzie jon prasiŭ prakuraturu razabracca z «internet-trolami», jakija ad jaho imia pišuć łuchtu. A ŭ 2016-m Mikałaja źniali z uliku kamisii pa biespracoŭi, pa jaho słovach — za aktyŭnuju hramadskuju pazicyju.
U lipieni 2020-ha mužčynu prymusova zabirali ŭ psichijatryčny dyspansier i pratrymali tam 21 dzień. Mikałaj raspaviadaŭ, što jaho pakinuli na taki termin, kab jon vyjšaŭ adtul užo paśla vybaraŭ.
Mikałaj Klimovič. Fota: jahonaja staronka ŭ fejsbuku
U sakaviku 2021-ha Klimoviča vyklikali na dopyt u prakuraturu pa spravie ab paślavybarčych pratestach u Pinsku. Mužčyna raspaviadaŭ, što tady vyklikali tych, kaho zatrymlivali pa słavutym administracyjnym artykule 23.34.
U mai 2022-ha Mikałaj pieranios insult.
Klimoviča zatrymaŭ HUBAZiK u śniežni 2022 hoda za antyvajennyja publikacyi ŭ «Adnakłaśnikach». Jon raspavioŭ paśla, što pakazvaŭ dakumienty pra invalidnaść, ale hubazikaŭcy tolki śmiajalisia ź jaho i admovilisia zdymać kajdanki, zmušali raspranacca i apranacca. Paśla jaho źmiaścili ŭ IČU, ale na nastupny dzień jaho adtul zabrała chutkaja, i mužčynu źmiaścili ŭ lakarniu na niekalki dzion.
Mikałaj Klimovič. Fota: archiŭ «Miedyja-Paleśsia»
U vyniku na jaho zaviali kryminalnuju spravu za łajk pad karykaturaj na Łukašenku. A taksama administracyjnuju spravu za «demanstracyju nacysckaj simvoliki» za karykaturu na Pucina. Da suda jon byŭ na voli.
«Luboje turemnaje źniavolvańnie dla mianie — heta śmierć, tamu što ja pavinien być pad pastajannym nahladam doktara, prymać vialikuju kolkaść mocnych lekaŭ. Ja mahu nie vytrymać navat miesiaca», — kazaŭ pinčuk pierad prysudam, jaho słovy pryvodziŭ «Pozirk».
28 lutaha 2023 hoda sudździa Andrej Byčyła prysudziŭ Mikałaju Klimoviču hod kałonii. 21 krasavika 2023 hoda jaho pieraviali ŭ kałoniju. A praz dva tydni jon pamior.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Invalida ź Pinska asudzili da kałonii za karykaturu na Łukašenku
U kałonii pamior palitviazień — pinski błohier Mikałaj Klimovič
