Ilustracyjnaja vyjava. Fota: vecteezy
Amierykanskaja vyviedka praanalizavała efiektyŭnaść antyrasijskich zachodnich sankcyj i vyjaviła paničnyja nastroi siarod finansavych elit Rasii z-za vajny va Ukrainie.
Infarmacyja, atrymanaja ź niepubličnych pryvatnych kanałaŭ šlacham prasłuchoŭvańnia i pierachopaŭ, pakazvaje, što rasijskija čynoŭniki, aliharchi i peŭnyja arhanizacyi, niahledziačy na ich publičnyja zajavy ab «nieŭsprymalnaści Rasii da sankcyj», uzmocniena šukajuć, jak schavacca ad abmiežavańniaŭ albo adaptavacca da ich.
«Adnak, niahledziačy na ŭsiu pryniesienuju škodu ad sankcyj i niazhodu častki rasijskich elitaŭ z praviadzieńniem vajny suprać Ukrainy, tyja naŭrad ci pierastanuć padtrymlivać Uładzimira Pucina. Pry tym, što hrošaj u Rasii na vajnu ŭ ciapierašnich ekanamičnych umovach chopić minimum na hod», — havorycca ŭ acency sakretnaha dakumienta ZŠA.
Va ŭciečcy niama infarmacyi adnosna taho, ci paŭpłyvaje abychod sankcyj na zdolnaść Rasii vajavać bolš efiektyŭna, ale amierykanskaja vyviedka pryvodzić niekalki prykładaŭ taho, jak mienavita adbyvajecca panika siarod rasijskich elit.
- Pa-pieršaje, va ŭciečcy pryvodzicca pierachopleny list ministra finansaŭ Rasii Antona Siłuanava da premjer-ministra krainy Michaiła Mišuścina, u jakim toj prosić «padtrymać płany na vypadak niepradbačanych abstavin, kab paźbiehnuć patencyjnaha haniebnaha krachu rasijskich dziaržaŭnych arhanizacyj». Havorka idzie ab Mižnarodnym inviestycyjnym banku, Mižnarodnym banku ekanamičnaha supracoŭnictva i Jeŭrazijskim inviestycyjnym banku, jakija patrapili pad zachodnija sankcyi (charakterna toje, što hetyja arhanizacyi nie majuć surjoznaha ekanamičnaha značeńnia dla Rasii, adnak, zhodna z danymi vyviedki, jany vykarystoŭvajucca dla admyvańnia hrošaj i patreb špijanažu za miažoj).
- Pa-druhoje, źlity dakumient źmiaščaje źviestki ab tym, što FSB «turbujecca ab niedachopie zamiežnaj valuty, jakaja zachoŭvajecca ŭ rasijskich bankach». Aproč hetaha rasijskija śpiecsłužby surjozna aścierahajucca ŭviadzieńnia druhasnych zachodnich sankcyj suprać kitajskich kampanij, jakija ŭsio jašče supracoŭničajuć z Rasijaj. Usie ździełki ź imi było zahadana zachoŭvać u sakrecie.
- Apošni prykład tyčycca PVK «Vahnier», jakaja biez tłumačeńnia pryčyn chvalujecca z-za ŭviadzieńnia amierykanskich sankcyj suprać rasijskaha MTS-Banka, što spynić tam praviadzieńnie dalaravych tranzakcyj z 15 traŭnia hetaha hoda. U sakretnym dakumiencie nie tłumačycca, čamu «Vahnier» zaniepakojeny losam mienavita hetaha banka.
Nahadajem, što raniej adzin ź viadomych rasijskich miljarderaŭ adkryta pradrok Rasii finansavy deficyt i vyčarpańnie hrošaj na praciahu hoda z-za niaŭmiełaj palityki krainy. Akramia hetaha vyśvietliłasia, što Rasija vydatkavała na adzin hod vajny suprać Ukrainy amal 115 miljardaŭ dalaraŭ.
Čytajcie taksama:
