Fota: Mindaugas Kulbis / Associated Press
Apošnim časam kupańnie ŭ ledzianoj vadzie stała svojeasablivaj modaj. Pieršaja parada pierad tym, jak apuskacca ŭ pałonku, — pravieryć svajo zdaroŭje, zaŭvažaje Delfi.lt.
Kupańnie ŭ chałodnaj vadzie nie rekamiendujecca pry sardečna-sasudzistych zachvorvańniach, cukrovym dyjabiecie, pry najaŭnaści ŭ arhaniźmie asiarodkaŭ zapaleńnia, pry parušeńni pracy ščytapadobnaj załozy, nyračnaj niedastatkovaści, pry najaŭnaści paškodžańniaŭ skury, nieŭrapatyčnych bolach, infiekcyjnych zachvorvańniach. Taksama nie varta kupacca paśla ŭžyvańnia ałkaholu ci biassonnaj nočy.
Prafiesar Skurvidas kaža, što ni ŭ jakim razie nie treba rezka apuskacca ŭ vadu i imknucca prabyć tam jak maha daŭžej. Tak pamylajucca niekatoryja ludzi, jakija śviadoma pakutujuć i dryžać ad choładu, dumajučy, što takim čynam pryvučać siabie da nizkaj tempieratury. Heta nie pravilna. Da apuskańnia ŭ chałodnuju vadu treba rychtavacca zahadzia — pastupova hartavać arhanizm.
Spačatku dla ŭmacavańnia imunitetu dastatkova pravodzić 30—60 siekund pad chaładnavatym dušam (čarhavać tempieraturu vady ad 16 da 30 hradusaŭ). «Chaładnavataj ličycca vada, kali jaje tempieratura nižejšaja za 20 hradusaŭ, chaładnavataje pavietra — toje, što nižejšaje za 12 hradusaŭ», — kaža Albiertas Skurvidas. Pa jaho słovach, u pieršy hod takoha zahartoŭvańnia nie rekamiendujecca kupacca ŭ vadzie, chaładniejšaj za 10 hradusaŭ, daŭžej za 5—10 chvilin.
«Kali cieła pačynaje dryžać ad choładu, treba nieadkładna vyjści z vady. Pierad kupańniem nieabchodna vielmi dobra razahrecca. Taksama varta sačyć za rytmam kupańnia, naprykład, dva razy na tydzień u adzin i toj ža čas», — raić spartyŭny ekśpiert.
Nie rekamiendujecca kupacca padčas haładańnia ci na hałodny straŭnik — lepš rabić heta paśla vuhlavodnaha śniadanku, bo, kali ŭ kryvi i ciahlicach nie budzie hlukozy, cieła nie zmoža dobra sahrecca znutry. Taksama padčas kupańnia na choładzie nie varta rezka apuskać hałavu pad vadu — heta moža zaškodzić sercu.
«Pieršyja dźvie-try chviliny nie śpiašajciesia płyści, a zachoŭvajcie spakoj u vadzie, bo vam treba dačakacca, pakul projdzie pieršy chaładovy šok», — raić Albiertas Skurvidas.
Tolki paśla dvuch hadoŭ pastupovaj zahartoŭki rekamiendujecca płavać u vadzie z tempieraturaj plus 4—7 hradusaŭ.
