«My abmiarkoŭvajem šyroki pieralik varyjantaŭ dapamohi Ukrainie. My rehularna kansultujemsia z ukrainskimi partniorami i inšymi sajuźnikami. Dapamoha ŭ halinie pavietranaj abarony zastajecca pryjarytetam dla Ministerstva abarony ZŠA i mižnarodnaj supolnaści. Što tyčycca sistem Patriot, to na hetym etapie my nie płanujem pastaŭlać ich Ukrainie. Ale, paŭtarusia, dyskusii pa hetym pytańni buduć praciahvacca», — skazaŭ Pet Rajder ŭ chodzie bryfinhu ŭ Pientahonie.
Pavodle jaho słoŭ, dla kiravańnia i absłuhoŭvańnia takich składanych sistem patrabujecca vysokakvalifikavany piersanał.
«Kali sprava dachodzić da peŭnych mahutnaściej, takich jak sistema «Petryjot», abo tanki M1, abo pieradavyja źniščalniki — havorka idzie pra mahčymaści, jakija patrabujuć dosyć istotnaj padtrymki, absłuhoŭvańnia i treniroŭki. Nivodnaja z hetych sistem nie funkcyjanuje pa pryncypie «padklučyŭ i pracuj», nielha prosta adpravić ich na pole boju i pačać vykarystoŭvać», — skazaŭ Rajder.
Pytańnie ab mahčymaści pradastaŭleńnia Ukrainie sistem «Petryjot», jakija b dazvolili joj efiektyŭna abaraniacca ad rasijskich rakietnych udaraŭ stała pradmietam intensiŭnych abmierkavańniaŭ, hałoŭnym čynam u jeŭrapiejskich palityčnych kołach i ŭ NATA apošnija tydni, asabliva paśla padzieńnia rakiety na ŭschodzie Polščy, achviarami jakoha stali dva čałavieki.
Napiaredadni ananimny vysokapastaŭleny pradstaŭnik amierykanskaha Ministerstva abarony zajaviŭ, što ZŠA razhladajuć roznyja varyjanty abarony Ukrainy ad rasijskich rakietnych udaraŭ, u tym liku sistemy «Petryjot».
Adkazvajučy na pytańnie, ci buduć ZŠA akazvać upłyŭ na sajuźnikaŭ, kali chtości ź ich pažadaje pieradać «Petryjot» Ukrainie samastojna, Rajder zajaviŭ, što nie choča havaryć ad imia inšych krain, ale heta suvierennaje rašeńnie dziaržaŭ.
Adnak, pakolki heta taksama tyčycca krain NATA, to ZŠA zychodziać z taho, što heta stanie pradmietam abmierkavańnia ŭsiaho aljansu.
«Znoŭ ža, my budziem praciahvać ciesna supracoŭničać ź mižnarodnaj supolnaściu, kab vyznačyć, jakija abaronnyja patreby Ukrainy, i zadavolić ich», — dadaŭ pradstaŭnik Pientahona.
