Jakija banki i što pamianiali
«RRB-Bank» abviaściŭ, što z 24 pa 30 listapada nie robić mižnarodnych pieravodaŭ fizičnych asob u dalarach. A z 1 śniežnia bank zabaraniaje mižnarodnyja pieravody fizičnych asob u dalarach na sumu, mienšuju za 20 000 dalaraŭ.
«Parytetbank» z 24 listapada prypyniŭ adpraŭku mižnarodnych hrašovych pieravodaŭ SWIFT u jeŭra dla fizičnych asob. Atrymlivać płaciažy SWIFT u jeŭra i inšych valutach, a taksama adpraŭlać mižnarodnyja płaciažy ŭ valutach, akramia jeŭra i dalaraŭ, možna jak i raniej.
Raniej «Pryjorbank» z 18 listapada ŭstanaviŭ novyja ŭmovy dla mižnarodnych pieravodaŭ: tolki z adkryćciom rachunku; tolki ŭ valucie, adroznaj ad dalara i (abo) jeŭra; tolki biez prodažu dalaraŭ i/abo jeŭra; minimalnaja suma — 10 000 dalaraŭ u ekvivalencie.
Akramia taho, płata za apieracyju śpisvajecca z rachunku klijenta i nie ŭklučaje vydatki, źviazanyja z vypłataj kamisij bankam-karespandentam (bankam-atrymalnikam), jakija ŭźnikajuć pry dadatkovych zapytach, rasśledavańniach, viartańniach pieravodaŭ.
U banka zastałasia opcyja pieravodu hrošaj za miažu z karty na kartu, ale z kanviertavańniem u biełaruskija rubli (kamisija 1,2% + 1,9 rubla) i limitam 900 rubloŭ na adnu apieracyju i 4500 rubloŭ u miesiac.
U «Technabanku» z 15 listapada mižnarodnyja bankaŭskija pieravody ŭ dalarach z pryznačeńniem, źviazanym z apłataj nabyćcia aŭtatranspartnych srodkaŭ i inšych spadarožnych hetamu pasłuh (pieravozka, dastaŭka aŭtatranspartnych srodkaŭ i da t.p.), robiacca tolki na sumu ad 10 000 dalaraŭ.
Što kažuć u bankach
«Technabank» admoviŭsia kamientavać rašeńnie pa mižnarodnych pieravodach u valucie dla fizičnych asob.
U «RRB-Banku» Office Life adpraviŭ piśmovy zapyt i čakaje adkazu.
«Pryjorbank» taksama admoviŭsia ad aficyjnych kamientaroŭ. A ŭ čacie na sajcie banka karespandentu Office Life skazali, što nie viedajuć, ci źjavicca kali-niebudź znoŭ opcyja SWIFT-pieravodaŭ dla nievialikich sum.
U «Parytetbanku» paviedamili, što pieranaładžvajuć praduktovuju liniejku, u tym liku i pieravody SWIFT u jeŭra i dalarach. Pry hetym i ciapier u klijentaŭ banka zastajecca mahčymaść pieravodzić za miažu hrošy ŭ dalarach i jeŭra praź inšyja instrumienty, naprykład p2p-pieravody.
Nakolki viadoma Office Life, rašeńni bankaŭ nie źviazanyja ź niejkimi novymi patrabavańniami z boku rehulatara i prymalisia imi samastojna.
Z čym mohuć być źviazanyja źmieny
Krynicy Office Life u bankaŭskich kołach sychodziacca ŭ tym, što pryčyny taho, što adbyvajecca ź mižnarodnymi pieravodami, varta šukać na baku bankaŭ-karespandentaŭ biełaruskich finustanoŭ za miažoj.
U listapadzie niekatoryja biełaruskija banki vyčarpali limity na SWIFT-pieravody, ustanoŭlenyja zamiežnymi bankami-partniorami. A abmiežavańni dla fizičnych asob uvodziacca, kab adsiekčy častku pieravodaŭ i dać mahčymaść svabodna pieravodzić hrošy jurydyčnym asobam.
Pa inšaj viersii, zamiežnyja partniory biełaruskich bankaŭ padniali taryfy na absłuhoŭvańnie SWIFT-pieravodaŭ, što robić ich niavyhadnymi dla biełaruskaha boku. Taksama krynicy na rynku źviartajuć uvahu, što ŭ bankaŭskaj supolnaści aścierahajucca mahčymaha ŭviadzieńnia novych abmiežavańniaŭ na SWIFT-pieravody ŭ budučyni.
Toj fakt, što ŭmovy pa ich źmianiŭ u tym liku i «Pryjorbank», praz karespandencki rachunak jakoha pracujuć mnohija biełaruskija banki, moža być kiepskim sihnałam dla rynku.
