Rasijskija samaloty ŭ niebie nad Minskam. 17 kastryčnika. Skryn ź videa
Pra heta 17 kastryčnika na bryfinhu raskazaŭ načalnik Departamienta mižnarodnaha vajennaha supracoŭnictva — pamočnik ministra abarony pa pytańniach mižnarodnaha vajennaha supracoŭnictva Valeryj Ravienka.
«Ahulnaja kolkaść da prybyćcia ŭ RB składzie da 9000 asabovaha składu, kala 170 tankaŭ, da 200 bajavych braniravanych mašyny i da 100 harmat i minamiotaŭ kalibram bolš za 100 mm», — adznačyŭ Ravienka.
Pamočnik ministra abarony dadaŭ, što rašeńnie ab razhortvańni RHV «pryniata i realizujecca vyklučna dla ŭzmacnieńnia abarony miežaŭ Sajuznaj dziaržavy».
«U jakaści pahroz biaśpieki Sajuznaj dziaržavy razhladajucca razhortvańnie hrupoŭki NATA pablizu miežaŭ na fonie adsutnaści dyjałohu, pavyšeńnie intensiŭnaści mierapryjemstvaŭ padrychtoŭki NATA z nastupalnaj tematykaj, zaachvočvańnie biełaruskich radykalnych elemientaŭ dla źviaržeńnia zakonnaj ułady ŭ Biełarusi», — rastłumačyŭ jon.
Za minuły miesiac pierakidvańnia rasijskaj techniki ŭ Biełaruś nie fiksavałasia. Naadvarot, žychary biełaruskich haradoŭ zafiksavali pieramiaščeńnie ŭ Rasiju niekalkich ešałonaŭ sa starymi tankami i «Urałami». Čyhunačniki, jakija padtrymlivajuć antyłukašenkaŭskaje padpolle, zdabyli dakumienty, jakija śviedčać, što techniku pierakidvajuć sa składoŭ zachoŭvańnia pad Lubańniu na Danbas.
Publična Alaksandr Łukašenka, a za im i hienierały zajaŭlajuć, što Biełaruś ustupić u vajnu tolki ŭ vypadku napadu na jaje terytoryju. Adnačasova prapahanda prahramuje siłavikoŭ i nasielnictva, što taki napad z boku Ukrainy, maŭlaŭ, abaviazkova adbudziecca, bo da hetaha nibyta ŭłady Ukrainy padšturchoŭvaje Zachad. «Respublika Biełaruś pakidaje za saboj prava pryniaćcia previentyŭnych mier stratehičnaha strymlivańnia dla niedapuščeńnia napadu», — zajaviŭ 17 kastryčnika pradstaŭnik Ministerstva abarony Biełarusi.
Pry hetym biełaruski bok zajaviŭ, što ŭ Biełaruś prybudzie kala 9000 rasijskich sałdat, a Alaksandr Łukašenka pryznaŭ udzieł Biełarusi ŭ «śpiecyjalnaj vajennaj apieracyi», što robić našu krainu lehitymnaj cellu dla ŭzmacniełaj ukrainskaj armii.
Sproba zachapić Kijeŭ i poŭnač Ukrainy ŭ lutym 2022 hoda była ažyćcioŭlenaja z terytoryi Biełarusi, što zrabiła našu krainu suahresaram u vačach mižnarodnaj supolnaści.
Pierad napadam Rasii Alaksandr Łukašenka prahnazavaŭ, što vajna skončycca pieramohaj ruskich «za try-čatyry dni». Pravał Rasii na pieršym etapie vajny staŭ niečakanaściu dla łukašenkaŭcaŭ. Prapahanda Minska praciahvała havaryć pra niepaźbiežnaść pieramohi Rasii i aśviatlała padziei ŭ tym ža duchu, što i rasijski aficyjoz. Sam Łukašenka nie raz kazaŭ, što «Rasija nie moža prajhrać». A biełaruskaja raźviedka, miarkujučy pa ŭsim, nie čakała i taho, što ŭkraincy piarojduć u kontrnastup na poŭdni.
U Minsku ŭsio jašče vierać, što pieramoha budzie za «sajuznaj dziaržavaj Biełarusi i Rasii». Kiraŭnik Kamiteta dziaržaŭnaj biaśpieki Ivan Cierciel u niadaŭnim vystupie pierad supracoŭnikami BiełAZa navat kankretyzavaŭ daty pačatku «pierałomu» — listapad 2022-ha.
Čytajcie taksama: Krynicy: Rašeńnie ab mabilizacyi ŭ Biełarusi pryniataje. Jana projdzie pad vyhladam pravierki bajazdolnaści
Jak paviedamili «Našaj Nivie» niekalki nie źviazanych pamiž saboj krynic, u Biełarusi pryniata rašeńnie ab mabilizacyi. Kolkaści ludziej, jakich płanujuć mabilizavać, my pakul nie viedajem.
Alaksandr Łukašenka pryniaŭ rašeńnie nie zajaŭlać pra mabilizacyju publična. Heta było zroblena z ulikam nastupstvaŭ takoha rašeńnia ŭ Rasii. «Schavanaja mabilizacyja» budzie prachodzić pad vyhladam pravierki bajazdolnaści čaściej i vykliku vajenaabaviazanych na zbory, jakija ŭ narodzie viadomyja jak «nabor u partyzany».
Pra mety mabilizacyi možna budzie mierkavać, viedajučy ličbu nabiranych.
«Nabor da 2000 čałaviek havaryŭ by pra daŭkamplektacyju asobnych čaściej pad vuzkija bajavyja zadačy, naprykład, artyleryjskija», — skazaŭ «Našaj Nivie» aficer Uzbrojenych sił Biełarusi.
«Tryvohu treba budzie bić, kali ličba mabilizavanych pieravalić za piać tysiač. Heta budzie aznačać stvareńnie ŭdarnaj hrupoŭki na niejkim kirunku. Kali pieravalić za 10 tysiač — niekalki hrupovak», — dadaje surazmoŭca.
«Našaj Nivie» dakładna viadoma, što pakul pozvy atrymlivajuć tolki žychary nievialikich rajonaŭ Biełarusi. Vialikija harady pieršaja chvala «schavanaj mabilizacyi» pakul nie zakranaje.
«Najbolšaja ŭstanoŭka na tyja vajenna-ŭlikovyja śpiecyjalnaści, jakich deficyt u rasijskaj armii», — kažuć nam abaznanyja krynicy.
Adna z krynic kaža, što «na zbory» vyklikajuć kiroŭcaŭ. Inšaja — «kucharaŭ, kiroŭcaŭ, techničny i tyłavy piersanał». Mahčyma, havorka idzie pra nabor na pieršym etapie taho absłuhoŭvajučaha piersanału, jaki zmoža zabiaśpiečyć padrychtoŭku samich mabilizavanych i techniki dla ich.
«Z 12 kastryčnika pa 12 listapada vajskovyja kamisaryjaty pravodziać źvierku ŭlikovych dadzienych ź miascovymi rasparadžalna-vykanaŭčymi orhanami i pradpryjemstvami», — heta ŭžo publična kažuć u efiry prapahandysckich ŚMI vajenkamy. Raniej takija źvierki adnamomantna nie pravodzilisia.
Alaksandr Łukašenka zajaviŭ, što rehijanalnaja biełaruska-rasijskaja hrupoŭka budzie składacca z 70 tysiač čałaviek. Praŭdzivaść hetaj ličby my nie možam niezaležna pravieryć.
Tłumačeńnie, čamu spatrebiłasia mabilizacyja, čytajcie tut: Krynicy ŭ armii patłumačyli, ci moža Łukašenka adpravić vojski va Ukrainu
* * *
Viedajecie važnaje, viedajecie bolš? Pišycie nam u telehram-bot @nasa_niva_bot. Albo — asabista tym žurnalistam i redaktaram «Našaj Nivy», jakich vy viedajecie i jakim daviarajecie (lepš — u sihnał ci telehram).
Z našaha boku hetyja miesiendžary abaronienyja. Ale pilnujciesia, kab u vas samich stajała padvojnaja aŭtentyfikacyja i aŭtamatyčnaje vydaleńnie.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Łukašenka ŭpieršyniu pryznaŭ udzieł Biełarusi ŭ vajnie va Ukrainie
Łukašenka: Mabilizacyi nie budzie, budzie pravierka reziervistaŭ
