Fota: SK
Na ciełach zahinułych žančyn ekśpierty znajšli šmatlikija kołata-rezanyja rany i ŭdary.
Pa padazreńni ŭ ździajśnieńni złačynstva supracoŭniki milicyi zatrymali 58-hadovaha žychara ahraharadka Karma, jaki chavaŭsia na fiermie — muža 38-hadovaj paciarpiełaj, ź jakoj razam jon nie žyŭ. U minułym hodzie jon pryciahvaŭsia da kryminalnaj adkaznaści za toje, što pahražaŭ joj zabojstvam.
Pieršapačatkova mužčyna nie pryznavaŭsia ŭ złačynstvie, ale paźniej, jak śćviardžaje SK, «padrabiazna raspavioŭ pra abstaviny zabojstva žančyn».
Zhodna z materyjałami spravy, viečaram 5 kastryčnika plamieńnica pryjšła ŭ hości da svajoj ciotki. Kali ściamnieła, tudy pryjšoŭ jaje muž. U dvary pamiž imi razhareŭsia kanflikt, padčas jakoha mužčyna źbiŭ žonku.
Na šum u dvary z domu vyjšła piensijanierka. Plamieńnica paprasiła jaje vyklikać milicyju. Pažyłaja žančyna viarnułasia ŭ dom pa telefon. Mužčyna znajšoŭ u susiednim pakoi nož i ŭdaryŭ jaje.
Potym jon, pavodle śledstva, zabiŭ nažom svaju žonku. «Zatym viarnuŭsia na pracu, pieraapranuŭsia i schavaŭ akryvaŭlenaje adzieńnie», — piša SK.
Śledčyja znajšli jaho rečy ŭ prykrytaj travoj jamie pobač ź fiermaj. Mierkavanuju pryładu złačynstva — zahornuty ŭ akryvaŭleny ručnik nož — znajšli ŭ travie ŭ dvuchstach mietrach ad chaty piensijanierki.
Raspačataja sprava pavodle č. 2 art. 139 (zabojstva dźviuch asob) Kryminalnaha kodeksa Respubliki Biełaruś.
