Łapo raspavioŭ, što Ukraina sa svajho boku ŭzarvała pahranmasty i zaminiravała darohi, «staviać supraćtankavyja miny ŭ try šerahi na darohach».
Heta śviedčyć pra hatoŭnaść Ukrainy abaraniacca, a nie nastupać, i takija miery nie lišnija z ulikam taho, što ŭ lutym 2022-ha ŭvarvańnie adbyłosia z terytoryi Biełarusi. Adnak u biełaruskaha hienierała heta vyklikaje pretenzii.
Pavodle kiraŭnika DPK, z ukrainskaha boku «vychodziać na miažu nie pamiežniki — terytaryjalnaja abarona».
«Źviedvajem my na sabie cisk, celacca ŭ našych pahraničnikaŭ, časam stralajuć u pavietra, viadziecca pastajannaja pavietranaja raźviedka», — zajaviŭ jon.
U toj ža čas na ANT vyjšaŭ siužet, dzie prapahandyst Ihar Tur raspaviadaje, što z ukrainskaha boku miažu patrulujuć «ałkaholiki i narkamany sa zbrojaj u rukach».
«Ci nie pryjdzie im u hałavu pa pjani ci pa duraści adkryć ahoń u bok čałavieka na biełaruskim baku. Adzin taki durań na miažy moža nie tolki zabić čałavieka, ale i spravakavać uzbrojeny kanflikt, kali zabitym akažacca biełaruski pamiežnik», — pradrakaje jon.
Siońnia ŭkrainskaja vyviedka zajaviła, što Rasija sprabuje ŭciahnuć Biełaruś u adkrytuju vajnu z Ukrainaj.
U svaju čarhu, ułady Biełarusi abvinavacili Kijeŭ u padrychtoŭcy ŭdaru pa Biełarusi, pasłu ŭručyli notu. U nocie biełaruski bok śćviardžaje, što Ukraina nibyta płanuje naniasieńnie ŭdaru pa terytoryi Biełarusi.
«Hetaja infarmacyja nie adpaviadaje rečaisnaści, my kateharyčna nie prymajem čarhovyja insinuacyi biełaruskaha režymu. Nie vyklučajem, što ŭručeńnie dypłamatyčnaj noty moža być častkaj płana Rasijskaj Fiederacyi pa ažyćciaŭleńni pravakacyi i nastupnym abvinavačvańni Ukrainy», — vykazalisia ŭ MZS Ukrainy.
