Badaj, kožny z nas pry pošuku tavaraŭ ci pasłuh u internecie źviartaje ŭvahu na rejtynh kampanii, kramy abo niejkaha kankretnaha tavara. Takija pavodziny całkam naturalnyja, bo my na padśviadomym uzroŭni ličym, što vodhuki pakidajuć takija samyja karystalniki, jak my, a značyć chłusić hetym ludziam sensu niama. Pra takuju łohiku pavodzinaŭ viadoma jak ŭłaśnikam biznesu, tak i śpiecyjalistam, jakija dapamahajuć prasoŭvać brend, tavar ci pasłuhu.
Čaściej za ŭsio nakručvać rejtynhi dapamahajuć usio tyja ž SMM-ahiencyi, što i ŭ vypadku z kamientarami pad videa na YouTube-kanałach.
Vohduki ŭ Google Maps i «Jandeks.Karty»
Kampanii, jakija zajmajucca nakrutkaj adznak i vodhukaŭ na kartach «Jandeks» i Google, prapanujuć roznyja taryfy. Cana vodhuku zaležyć ad jakasnych pakazčykaŭ. Naprykład, razhornutyja kamientary na niekalki skazaŭ kaštujuć daražej za standartnyja vyrazy nakštałt «dobry servis», «usio spadabałasia» i h.d.
Adzin vodhuk u zaležnaści ad źmiestu kaštuje ŭ siarednim ad 3 da 5 dalaraŭ. Adznaka biez vodhuku — kala 1$. U internecie možna zamović nie tolki pazityŭnyja adznaki i kamientary, ale i niehatyŭnyja. Nizkija adznaki pa ŭsioj bačnaści zamaŭlajuć dla kankurentaŭ.
Zaŭvažna, što za bolš vysokuju canu pasiaredniki prapanujuć i bolš vysokuju jakaść pasłuhi, tamu vierahodna, što kali niechta nie paškadavaŭ hrošy na darahija vodhuki, to jany buduć vyhladać całkam naturalna.
Aproč vodhukaŭ na «Jandeks» i Google (praz sankcyi pakidać adznaki i kamientary na Google ŭ Biełarusi časova nie mahčyma), admysłovyja ahiencyi prapanujuć pasłuhi pa napisańni vodhukaŭ na takich placoŭkach, jak Wildberries, Ozon, «Jandeks.Markiet» i h.d.
Kamienty na Wildberries abo Ozon kaštujuć pa 9 dalaraŭ, a na takich sajtach, jak Otzovik ci Irecommend — pa 15$. Pry kupli vodhukaŭ pa vyšejzhadanych cenach ahiencyi harantujuć, što kamientar budzie napisany prafiesijnym aŭtaram, jaki pakinie paŭnavartasny vodhuk z ulikam usich techničnych niuansaŭ zhodna z abranaj tematykaj.
Na raźmiaščeńni fejkavych vodhukaŭ zarablajuć nie tolki ahiencyi, jakija arhanizujuć uvieś hety praces, ale i zvyčajnyja karystalniki, što adhukajucca na abjavy «zarobak u internecie». Dla pošuku takoj padpracoŭki isnujuć admysłovyja servisy.
Dzie jašče vykarystoŭvajuć takija schiemy?
Z vykarystańniem padobnych schiem raskručvajuć telehram i jutub-kanały, čaty ŭ vajbier, staronki ŭ sacyjalnych sietkach i h.d.
U zaležnaści ad płatformy, na jakoj treba zdiejśnić aktyŭnaść, vykanaŭcu dajuć zadańni.
Naprykład, za 0.02 $ treba znajści ŭ jutubie videa «Naš adpačynak u Turcyi. Ałanija». Pahladzieć rolik nie mienš za dźvie chviliny, paśla prahladu padpisacca na kanał i nacisnuć na «zvanočak». Zamoŭščyk papiaredžvaje, što adpisvacca ad kanała nielha, inakš vykanaŭca patrapić u čorny śpis pasiarednika.
Takskama niekalki dziesiatkaŭ centaŭ možna zarabić padpisaŭšysia na čaty ŭ vajbier, kanały ŭ telehram i h.d.
Paśla rehistracyi tolki na adnym z admysłovych sajtaŭ, jakija prapanujuć zarobak u internecie, my ŭbačyli bolš za 1800 zadańniaŭ ahulnym koštam bolš za 800 dalaraŭ. Z hetaha vynikaje, što siaredni košt aktyŭnaści acenieńvajecca pryblizna ŭ 45 dalaravych centaŭ.
Cikava, što takim samym čynam nakručvajuć i rejtynhi ŭ Play Market. Ad vykanaŭcy patrabujuć ustalavać dadatak, pakinuć kamientar i acanić luby inšy kamientar.
Na hetych ža sajtach raźmiaščajuć zamovy na kamientary pad videa ŭ jutub. Zakazčyki źviartajuć uvahu na toje, što kamientar musić mieć nie mienš za 8 słoŭ, a na avatarcy ŭ kamientara abaviazkova pavinna być niejkaje fota.
Vyhladaje, što ŭvod karystalnikaŭ u zman — asobny vid biznesu ŭ internecie.
Inšy sposab nakrutki rejtynhaŭ — giveaway (rozyhryšy), jakija čaściej za ŭsio pravodziać u Instagram, na hetuju temu my padrabiazna pisali raniej.
Čytajcie taksama: Rozyhryšy ŭ Instagram — ašukanstva ci realnaja mahčymaść atrymać kruty pryz i raźvić svoj akaŭnt?
