Panzerhaubitze 2000
Adznačajecca, što jašče 13 lipienia vice-kancler Hiermanii Robiert Habek daŭ svaju zhodu na prodaž SAU, ale hetuju infarmacyju sam KMW paćvierdziŭ tolki ciapier. Zvarot adnosna žadańnia kupić PzH 2000 Ukraina nakiravała jašče ŭ krasaviku.
Pa słovach pradstaŭnika KMW, ahulny košt kantrakta na 100 samachodnych artyleryjskich ustanovak dla Ukrainy składaje 1,7 miljarda jeŭra — heta ŭ niekalki razoŭ bolš, čym ahulny košt usioj dahetul dadzienaj Hiermanijaj zbroi (600 miljonaŭ jeŭra).
Čakajecca, što vytvorčaść usich SAU praciahniecca niekalki hadoŭ, ličyć niamiecki vytvorca. Jon adznačaje, što praces pačniecca nieadkładna i, choć budzie zaležać ad pastavak nieabchodnych materyjałaŭ, usie jaho niuansy ŭžo byli ŭzhodnienyja z ukrainskim bokam.
Raniej Ukraina ŭžo atrymała ad Hiermanii niekalki PzH 2000. Jany ličacca adnymi z samych sučasnych samachodnych artyleryjskich ustanovak u śviecie, zdolnyja traplać u celi na adlehłaści da 40 kiłamietraŭ i stralać z chutkaściu da 10 snaradaŭ za chvilinu.
Raniej stała taksama viadoma pra toje, što Hiermanija pieradała Ukrainie try abiacanyja reaktyŭnyja sistemy załpavaha ahniu MARS-II i try samachodnyja artyleryjskija ŭstanoŭki Panzerhaubitze 2000.
U apošnija tydni Bierlin nie raz krytykavali za pavolnyja pastaŭki zbroi Ukrainie, u pryvatnaści, praz tak zvanuju schiemu kruhavoha abmienu. Niamieckija čynoŭniki sami pryznavali prablemy z zabieśpiačeńniem.
