U svaim vystupie Erdahan, lidar hetaj partyi, spačatku paprasiŭ paplečnikaŭ danieści da vybarščykaŭ, što Turcyja adyhrała vielizarnuju rolu ŭ stvareńni «zbožžavaha kalidora», a potym zahavaryŭ pra ŭzbrajeńni.
U pryvatnaści, jon skazaŭ, što Pucin prajaŭlaje cikavaść da zaklučeńnia pahadnieńnia i navat hatovy pryniać udzieł u budaŭnictvie zavoda pa vyrabie bieśpiłotnikaŭ «Bajraktar», jakija robić tureckaja kampanija Baykar.
Inšych detalaŭ Erdahan nie pryvioŭ, ale viadoma, što 5 žniŭnia jon maje namier naviedać Maskvu.
Sam Baykar pry hetym zajmaje vyrazna praŭkrainskuju pazicyju, jaho hiendyrektar Chałuk Bajraktar 19 lipienia kazaŭ, što nie budzie pastaŭlać bieśpiłotniki ŭ Rasiju.
Vytvorcaŭ lehiendarnych bieśpiłotnikaŭ, darečy, źviazvajuć z Erdahanam rodnasnyja suviazi. Chałuk Bajraktar zasnavaŭ kampaniju razam sa svaim bratam Sielčukam Bajraktaram, jaki źjaŭlajecca inžynieram i techničnym dyrektaram kampanii, a taksama ziaciem prezidenta Turcyi.
