Ilustracyjnaje fota. Pexels.com
Dziela biaśpieki hieraini «7ch7» nie raskryŭ jaje imia, adras jaje doma i maršrut pachodu, nie publikuje jaje fatahrafii. 6 sakavika jana vyjšła na pikiet, pratestujučy suprać vajny va Ukrainie. U dziaŭčyny tam šmat svajakoŭ, svajaki i znajomyja ŭ Maryupali zahinuli, vyratavałasia tolki siamja jaje siastry ź Biardzianska:
Kali šok ad padziej va Ukrainie adstupiŭ, dziaŭčyna vyrašyła iści ŭ antyvajenny piešy pachod.
— Heta była pieršaja dumka: ja pavinna iści. Ale spačatku nie vieryła ŭ svaje mahčymaści, čaplałasia za svajakoŭ. Ciapier ja pierastała heta rabić, tamu idu. U pieršuju čarhu, za budučyniu svaich małodšych brata, siastry i plamieńnicy. Chaču, kab u ich pierad vačyma byŭ prykład, što navat u takoj krainie jość niejki praśviet.
U 2020 hodzie ŭ Nanaka zdaryŭsia prystup psichičnaj chvaroby, joj daviałosia viarnucca z Maskvy dadomu ŭ Piermski kraj. Z-za doŭhaha lačeńnia Nanaka prapuściła naviny pra masavyja pratesty ŭ Biełarusi paśla žnivieńskich prezidenckich vybaraŭ.
— U trankvilizatarnym kamatozie praspała Biełaruś, za što mnie vielmi soramna. Potym pryjšłosia nahaniać — jak ludziam, jakija vychodziać z komy i pytajucca, jaki ciapier hod.
Nanaka nazyvaje siabie fanatkaj biełarusaŭ: «Jany — idealnaja viersija taho, jakim pavinien być słavianski čałaviek. Ja paraŭnoŭvała ich pratesty i pratesty rasijan, kantrast ašałamlalny». Jana pieražyvaje, što biełaruskija palitviaźni «pad miačom chodziać», bo ŭ Biełarusi niama maratoryja na śmiarotnaje pakarańnie.
Mienavita tamu finalny punkt pachodu Nanaki — Minsk.
Dziaŭčyna abrała pachod jak formu palityčnaj akcyi, tamu što lubić chadzić pieššu. Kali ŭ jaje byli mahčymaści, dziaŭčyna chadziła ŭ doŭhija piešyja pachody z zaplečnikam pa Šviecyi, Ispanii i Kamčatcy.
U dziaŭčyny dźvie mety: svaim prykładam dapamahčy ludziam stać śmialejšymi ŭ vykazvańni asabistaj antyvajennaj pazicyi: «Čym dalej ja budu iści, čym bolš ja budu kazać ličbaŭ, kolki ja prajšła, tym śmialejšymi buduć stanavicca ludzi, jakija sa mnoj razmaŭlajuć», i sabrać hrošy na dapamohu palitviaźniam.
«Kali b palitviaźni nie siadzieli ŭ turmie, usiaho hetaha [biezzakońnia] nie adbyvałasia b. Ludzi pavinny heta zrazumieć, — kaža jana.
Dziaŭčyna čuła historyju jakuckaha šamana Alaksandra Habyšava, jaki dvojčy vychodziŭ na akcyju pratestu suprać Uładzimira Pucina ŭ farmacie maršu ź Jakucii da Maskvy. Jaho zatrymlivali pa darozie.
— Jon natchniaje, ale ja pasprabuju dajści, — kaža jana.
Z saboj dziaŭčyna biare pałatku, spalny miašok, turystyčny dyvanok, palehčanuju pachodnuju kuchniu, adzieńnie dla horada i dla pierachodaŭ. Iści adnoj joj nie strašna: «Mianie žyćcio zahartavała tak, što ja hatovaja maralna, psichična da ŭsiaho».
Nanaka starajecca nie prahnazavać, jakim mienavita budzie jaje pachod, kolki času jon zojmie i što jaje čakaje. Jana trymaje ŭ hałavie tolki finalnuju kropku, da jakoj choča pryjści:
— Heta fotazdymak z płakatam «Vitaju, śviet» u centry Biełarusi. Heta było b vydatna.
