Andrej Śliziuk na pracy. Fota: archiŭ hieroja publikacyi
«U Biełarusi ja pracavaŭ u MNS z 2014 hoda. Mianie ŭ pačatku 2021 hoda navat pryznačyli na aficerskuju pasadu,
— raskazvaje chłopiec. — Nikoli nie zatrymlivali za pratesty, mieŭ dobryja charaktarystyki. Ja ž navat družyńnikam byŭ — rabiŭ vyhlad, što chadžu ź milicyjaj, a tym časam pisaŭ u dvaravyja čaty, dzie idzie «dazor». Ale heta była takaja pakazucha, nikomu nie patrebnaja, i navat učastkovamu było ŭsio roŭna.
Andrej padčas patrulavańnia dvaroŭ. Na fota — samy krajni sprava ŭ mascy. Fota: rolik kanała ANT
Ja zrazumieŭ jašče ŭ 2010 hodzie, što ŭ našaj krainie adbyvajecca niešta drennaje. U 2011-m ja chadziŭ na «maŭklivyja» pratesty. Ale zrazumieŭ, što tady nas realna była mienšaść, a astatnich cikaviła, jak kupić ladoŭniu, a nie toje, kudy idzie kraina. I kali nas mienšaść, to varta žyć i krucicca dalej.
Ale ŭ 2020 hodzie ja ŭśviadomiŭ, što situacyja zusim inšaja. Karol hoły, jaho nichto nie padtrymlivaje, ja pabačyŭ, što adbyvałasia na ŭčastkach. I što bolšaść za źmieny.
I padčas pratestaŭ ludzi pačali ŭ dvarach sustrakacca, a ja dałučyŭsia — «my nie viedali adno adnaho da hetaha leta», jak kažuć. Tak i adbyłosia, bo my daviedalisia, što stolki ludziej dobrych pobač žyvuć. Ja taksama ŭdzielničaŭ u roznych dvaravych akcyjach, vyviešvaŭ ściahi na rajonie.
Ściahi, jakija vyviešvaŭ Andrej u rajonie Sucharava. Fota: archiŭ hieroja publikacyi
Ź Biełarusi ja vyjechaŭ uvosień 2021 hoda praz Ukrainu, kali aryštavali Alaksieja Ivanisava, ź jakim my siabravali. Ciapier jon prachodzić pa spravie hrupy «Busły laciać». My ź im paznajomilisia na dvaravych čajavańniach jašče ŭ 2020 hodzie.
Alaksiej — dobry čałaviek, i maci ŭ jaho cudoŭnaja. Nu, jaki jon teraryst — heta łuchta. Ja pamiataju, jon zapomniŭsia ŭ dvary, bo pryjšoŭ na čajavańnie z dvuma svaimi sabakami. I jon staraŭsia dapamahać ludziam navokał. Pamiataju, kali tavaryša ŭziali na sutki ŭvosień 2020-ha, to Alaksiej prydumaŭ torcik jamu śpiekčy, kab jaho sustreć.
Alaksiej Ivanisaŭ
My ščylna stasavalisia, na piva chadzili, hutaryli na kuchni za roznyja temy. A ŭ studzieni 2022 hoda ŭžo ŭ mianie byli pieratrusy pa niejkaj kryminalnaj spravie, pra jakuju ja tołkam ničoha nie viedaju.
Ja ž viedaju, što ŭ nas lubiać raskryvać niejkija zmovy i lapić ź ludziej arhanizavanyja hrupy dziela «zoračak». Jość vypadki, kali biaruć kantaktnuju knihu i pajšło-pajechała.
Kali vyrašyŭ źjechać, to na pracy heta było nadzvyčajnaje zdareńnie, kaniešnie — što aficer raptam nie vyjšaŭ na pracu.
Andrej Śliziuk padčas pracy, pryjšoŭ prainfarmavać pra pažarnuju biaśpieku. Fota: archiŭ hieroja publikacyi
Śpis terarystaŭ — heta cyrk. Ja nie teraryst. Tam arhanizatary terarystyčnych arhanizacyjaŭ kštałtu IDIŁ naroŭni z kamientatarami ŭ telehram-čatach. Heta robicca, kab napužać ludziej, a niazhodnych nie zastałosia ci jany maŭčali.
Navat kali pahladzieć toje, što pradjaŭlena Lošy Ivanisavu — akno niejkaje raźbili, razmalavali mašynu. Heta nie teraryzm, bo anijakaj fizičnaj škody heta nanieści nie moža inšym ludziam
Ciapier ja žyvu i pracuju ŭ Polščy, my budujem pryvatnyja damy. Zarobak u paŭtary razy vyšejšy, čym na aficerskaj pasadzie ŭ MNS».
Čytajcie jašče:
Siońnia raspačynajecca sud pa spravie «Busły laciać». Na łavie padsudnych — šeść čałaviek
Kamientatary i spravakavany KDB mužčyna. U «terarysty» ciapier masava zapisvajuć za vykazvańni. Raskazvajem pra novyja imiony ŭ śpisie
