Fota: «Novy čas»
15 červienia ŭ Małarycie raspačniecca sud nad palitźniavolenaj Ludmiłaj Ramanovič.
Sudździoj vystupić Taćciana Navumovič. Praces budzie prachodzić u adkrytym režymie, paviedamlajuć pravaabaroncy. Zvyčajna vynik takich palityčnych sudoŭ pradvyznačany, sudździ dajuć toje, što patrabuje prakuratura, sto pracentaŭ prysudaŭ abvinavaŭčyja.
Ludmiłu Ramanovič zatrymali 4 krasavika, a potym źmiaścili ŭ brescki SIZA. Farmalna žančynu abvinavačvajuć u abrazie Alaksandra Łukašenki z-za lista, jaki žančyna dasłała ŭ Śledčy kamitet. Artykuł 368 Kryminalnaha kodeksa, «źniavaha prezidenta Respubliki Biełaruś».
Ramanovič pryncypova pratestavała suprać parušeńniaŭ zakonnaści šlacham zvarotaŭ u dziaržaŭnyja orhany, u adnym ź listoŭ u SK jana napisała pra «ŭzurpacyju ŭłady» Łukašenkam.
Napačatku sakavika Ramanovič źviarnułasia ź listom-pratestam u Administracyju Łukašenki suprać vykarystańnia terytoryi Biełarusi dla vajny suprać Ukrainy.
Pa prafiesii Ramanovič mielijaratarka, była bryhadziram-pieradavikom.
Kali ŭ 2020 hodzie jaje zatrymlivali padčas masavaha narodnaha ŭzdymu, jana papała ŭ adnu kamiery z «bieraściejskaj Žannaj d'Ark» Alenaj Hnaŭk. Ludzi, jakija siadzieli ŭ IČU ŭ toj ža čas, uspaminajuć, što žančyny ŭvieś čas śpiavali biełaruskija i ŭkrainskija narodnyja pieśni.
Siabry nazyvajuć jaje čałaviekam vialikaj dušy i ćviordych pryncypaŭ.
Viadoma, što Ramanovič i z turemščykami havaryła na rodnym bieraściejskim dyjalekcie.
Viadoma taksama, što, jak i inšym palityčnym,
u SIZA joj biespadstaŭna prysvojeny status «ekstremistki», hulać jaje vyvodziać z sabakami.
Adras dla pisiem i hrašovych pieravodaŭ: SIZA-7, Brest, vuł. Savieckich Pahraničnikaŭ 37, 224030. Ramanovič Ludmile Siarhiejeŭnie
