Ukrainski kietčup — usio?
Jašče ŭ siaredzinie sakavika palicy z kietčupami i tamatnaj pastaj vyhladali bolš čym pierakanaŭča. Brendy «Čumak», «Torčyn», «Ščodry» prapanoŭvali pa niekalki vidaŭ sousaŭ, harčycy i adžyki. Ciapier usio heta źnikła, apošnija reštki raskošy — voś hety sous «Čyli» za 4,06 rubla.
Zrešty, u mnohich inšych kramach i hetaha niama, i padobna, što pra ŭkrainskija kietčupy pakul što treba zabycca. Vyzvalenaje miesca dzielać biełaruskija i rasijskija pradukty plus Polšča i Azierbajdžan, jakich raniej u kramach u takich abjomach nie było.
Kudy ŭ takim vypadku syšoŭ ukrainski kietčup? Brend «Torčyn» naležyć kampanii Nestle, jakaja na nastupny dzień paśla pačatku bajoŭ zakryła svaje vytvorčaści i składy va Ukrainie. Z tych časoŭ pra adnaŭleńnie vytvorčaści navin nie było.
Źniknieńnie «Čumaka» zaŭvažyli ŭ litoŭskich handlovych sietkach i, miarkujučy pa ŭsim, pakul jon nie dajazdžaje navat da ŭkrainskich kramaŭ.
Taki asartymient byŭ u biełaruskich kramach u sakaviku 2022 hoda
Sprava ŭ tym, što vytvorčaść i składy «Čumaka» znachodziacca ŭ Kachoŭcy Chiersonskaj vobłaści, jakaja zaniataja rasijskimi vajskoŭcami. Praz bajavyja dziejańni zavod nie paciarpieŭ, ale z 24 lutaha jon nie pracuje, bo nie maje mahčymaści vyvieźci z horada svaju pradukcyju.
Na pačatku maja na składach kampanii byli paŭhadavyja zapasy, ale pradavali ich tolki kramy ŭ Kachoŭcy, raskazvaŭ ukrainskamu Forbes adzin z saŭładalnikaŭ kampanii. Pradukcyja «Čumaka» u inšych haradach Ukrainy zakančvajecca (ci ŭžo skončyłasia).
Źmieny jość i na palicach z łokšynaj chutkaha pryhatavańnia. U sakaviku amatary ŭkrainskaj «Miviny» nie adčuvali nijakaha deficytu. Ciapier pradukcyju pastupova raskuplajuć i asartymient pabiadnieŭ.
U sakaviku ŭ kramach było niekalki vidaŭ samaj biudžetnaj łokšyny, ciapier jość bolš darahaja ŭ rajonie 2 rubloŭ
«Mivina», jak i «Torčyn», naležyć Nestle, tamu vytvorčaść i składy zakryli paśla pačatku vajennych dziejańniaŭ. Niekalki hadoŭ tamu ŭ kampanii raskazvali, što tracina chutkaj łokšyny idzie na ekspart, ale i ŭnutrany rynak atrymlivaje niamała.
Ciapier na ŭkrainskim rynku zaŭvažyli, što «Mivina» źnikła z palic supiermarkietaŭ. «Na žal, z-za aktyŭnych bajavych dziejańniaŭ niedaloka ad Charkava my byli vymušanyja prypynić pracu fabryki «Mivina», bo biaśpieka našych supracoŭnikaŭ — naš hałoŭny pryjarytet», — tak patłumačyli situacyju ŭ kampanii.
Roshen začyniŭ dva zavody, dla soka nie chapaje ŭpakoŭki
Navat kali vy nie vielmi pavažajecie harodninu, napeŭna mahli bačyć u kramach strojnyja šerahi praduktaŭ marki «Vieras». Heta samy bujny vytvorca aharodninnych kansiervaŭ va Ukrainie, jaki da niadaŭniaha času spraŭna adhružaŭ kabačkovuju ikru, ahurki i inšaje ŭ Biełaruś.
Centralny ofis u kampanii — u Kijevie, asnoŭnyja sielhasaktyvy — u samych uradlivych rehijonach krainy, Čarkaskaj i Mikałajeŭskaj abłaściach.
Miarkujučy pa ŭsim, praca kampanii nie spyniałasia. Na aficyjnym sajcie pisali, što pracujuć «štodnia ŭ nadzvyčajnym režymie» i navat vypuścili novyja pradukty. Ale ŭ Biełaruś jany, jak i inšaja ŭkrainskaja ježa, pakul nie jeduć.
Na palicach biełaruskich kramaŭ pakul jość zapas. Ale vidać, što košty nie zakansiervavalisia, a za try miesiacy paśpieli padraści: bakłažannaja ikra kaštavała 4,68 rubla, ciapier 5,38, fasola z hrybami ciapier kaštuje 6,39 zamiest 5,96.
Cełyja stełažy byli zaniatyja sokami vytvorčaści «Vitmark-Ukraina». Mahčyma, nazva hetaj kampanii vam ni pra što nie kaža, ale takuju ŭpakoŭku z Adeskaha zavoda vy dakładna bačyli.
Try miesiacy tamu ŭ hetaj kramie było siem vidaŭ «Adeskaha» — zastaŭsia adzin.
Jaffa — taksama sok hetaha vytvorcy.
Paśla pačatku bajoŭ na vytvorčaści byŭ dzieści tydzień prastoju, potym raźliŭ sokaŭ i niektaraŭ znoŭ zapuścili. Praŭda, niekatoryja prablemy ŭsio adno jość: adeski port zabłakavany, i praź jaho niemahčyma adhruzić pradukcyju, častka daroh adsutničaje (heta ŭskładniaje łahistyku), nie chapaje ŭpakoŭki.
Piure Snail Bob zastałosia tolki adnaho vidu, cana nie źmianiłasia.
Pakul inšuju ŭkrainskuju ježu raskuplali, kukuruznaj krupy, naadvarot, stała bolš.
Šakaładki, piečyva, vafli, cukierki Roshen u najaŭnaści. Mabyć, imparciory paśpieli zrabić dobry zapas pierad tym, jak pastaŭki spynilisia, ale asobnyja pazicyi: naprykład, šakaład Lacmi z małočnaj načynkaj i vaflaj, paśpieŭ padaražeć na 35% (byŭ 2,65 rubla, staŭ 3,59), vypiečka Lovita z kłubničnym smakam — na 48%.
Mienš za ŭsio vybaru ŭkrainskaha — u cukierkach na vahu.
Sama kampanija Roshen z pačatku bajoŭ pieražyvaje nie najlepšyja časy. Dźvie fabryki — u Kijevie (dzie vypuskali ŭ asnoŭnym tarty) i Baryspali — začynili, jašče dźvie — u Vińnicy i Kramienčuhu — nie na poŭnych mahutnaściach, raskazvaŭ u sakaviku vydańniu Forbes hiendyrektar i saŭładalnik Roshen Viačasłaŭ Maskaleŭski.
U asnoŭnym popyt — na piečyva, šakaład nie kuplajuć, apisvaŭ toje, što adbyvajecca, top-mieniedžar, da taho ž u cełym popyt prykmietna asieŭ.
Anałahična aceńvaŭ situacyju imparcior Roshen u Biełaruś u sakaviku: prysmaki — heta nie pradmiet pieršaj nieabchodnaści, ich skuplać nie buduć, na niekatory čas zapasaŭ pavinna chapić. Pakul pradajuć zapasy.
A voś šakaładak Milka ŭkrainskaj vytvorčaści nie zastałosia, tolki rasijskija.
Mondelēz International, vytvorca ŭkrainskich Milka, paviedamlaŭ, što abodva jaho zavody surjozna paciarpieli z-za bajavych dziejańniaŭ, vidavočcy paviedamlali pra pažar na Traścianieckaj kandytarskaj fabrycy.
Mondelēz International acaniła straty dla siabie ŭ $143 młn. Z zapasaŭ ukrainskaj pradukcyi Mondelēz International zastalisia abrykosavyja pirožnyja «Barni».
U kampanij, jakija zajmalisia impartam ukrainskaj pradukcyi ŭ Biełaruś, pakul niama asablivych navin: kažuć, što adsočvajuć naviny, jak i ŭsie astatnija, ale pakul iduć vajennyja dziejańni, pastaŭki naŭrad ci buduć.
A što budzie z pamidorami i čarešniaj?
Na Kamaroŭcy ŭnosili raznastajnaść chiersonskija pamidory i kavuny, čarešnia i bulba adusiul. Ciapier my možam chiba što tolki panastalhiravać, jak heta było.
U pačatku hetaha hoda polskija jabłyki patrapili pad kontrsankcyi, ich sprabavali zamianić ukrainskimi (niadoŭha).
U Chiersonskaj vobłaści, jakuju ličać hałoŭnym pastaŭščykom ukrainskaj harodniny, ź lutaha išli aktyŭnyja bai. Adnym z vynikaŭ stała toje, što pieršaja harodnina z terytoryj, jakija zaniatyja rasijskaj armijaj, jedzie va ŭschodnim kirunku.
Tyja ž pamidory vyroščvajuć va ŭsich rehijonach krainy, ale samymi viadomymi byli chiersonskija. Uzamien hetaha ŭkraincy ciapier čakajuć uradžaju ŭ Adeskaj vobłaści.
Tyja, chto kuplaŭ harodninu dla jaje pieratvareńnia ŭ zakatki, znajomy ź lehiendarnaj ukrainskaj kamiennaj sollu. «Arciomsol» źnikła ź biełaruskich kramaŭ pieršaj. Deficytu z-za hetaha nie ŭtvaryłasia, tolki sum pa źnikłym zvykłym pradukcie.
Ad supracoŭnictva nichto nie admaŭlaŭsia — kali heta stanie mahčyma, ukrainskuju sol buduć vazić u Biełaruś, raskazvaŭ nam imparcior. Pakul ža nijakija pastaŭki niemahčymyja: z-za vajennych dziejańniaŭ pradpryjemstvu, jakoje znachodzicca ŭ Danieckaj vobłaści, pryjšłosia spynić svaju pracu, abstalavańnie zakansiervavali.
Ukrainski bok paviedamlaŭ, što z-za abstrełaŭ paškodžanyja rudniki i skład. Zapasy hatovaj pradukcyi paśpieli vyvieźci, ale, tym nie mienš, Ukrainie ciapier davodzicca zakuplać bolš impartnaj soli: zvykłaj «Arciomsoli» niama.
