Fota: hata.by
Aŭhustoŭski kanał (Hrodzienski rajon)
Kaardynaty GPS: 53.863386, 23.63319
Fota: hata.by
Pačać pajezdku možna z Aŭhustoŭskaha kanała — znakamitaha abjekta, jaki dzielać pamiž saboj Polšča i Biełaruś. Meta kanała — abjadnać Visłu i Nioman, i heta adzin z najvialikšych sudnachodnych kanałaŭ u śviecie, słavutaść, u skład jakoj uvajšli 11 rek i 7 azior, a taksama niekalki šluzaŭ i mastoŭ.
Kanał i jaho vakolicy dobra padychodziać nie tolki dla vodnaha, ale i dla piešaha turyzmu, tym bolš što biełaruskaja častka kanała (21 kiłamietr sa 101) całkam adnoŭlenaja. Na miescy staroj karčmy jość muziej, dzie možna ŭbačyć staryja fotazdymki i bytavyja pradmiety, jakija naležali ludziam, jakija niekali žyli ŭ vakolicach.
Uźniasienski kaścioł (Hrodzienski rajon, Sapockin)
Kaardynaty GPS: 53.830022, 23.645521
Fota: vedaj.by
Niedaloka ad Aŭhustoŭskaha kanała jość miastečka Sapockin, dzie chapaje svaich cikavostak. Samaja maštabnaja ź ich — kaścioł Uźniasieńnia Dzievy Maryi.
Pabudavali jaho ŭ kancy 18 stahodździa. Amal praz stahodździe, u 1867 hodzie, kaścioł pieradali pravasłaŭnamu Praabraženskamu žanočamu manastyru, i tady chram značna pierabudavali: źnieśli dźvie vialikija viežy, što niekali ŭpryhožvali hałoŭny fasad. Paśla Pieršaj suśvietnaj chram znoŭ pieradali katolikam, ale ž paźniej jon pieražyŭ jašče dva pažary, paśla jakich byŭ adnoŭleny.
Kali budziecie ŭ Sapockinie, naviedajcie taksama staražytnyja jaŭrejskija mohiłki, jakija niekatoryja historyki adnosiać ažno da 13 stahodździa, i katalickija mohiłki, kab pabačyć kaplički ŭ styli nieahotyki.
Najstarejšy ŭ Biełarusi čyhunačny vakzał (Hrodzienski rajon, vioska Parečča)
Kaardynaty GPS: 53.885832, 24.134707
Fota: wikimapia.org
U maleńkaj biełaruskaj viosačcy možna znajści čyhunačny vakzał, jaki bolš nahadvaje pałac. Šykoŭny budynak u Pareččy ŭźviali na pačatku 20 stahodździa, i mienavita ŭčastak Parečča — Hrodna staŭ pieršaj čyhunačnaj linijaj u Biełarusi.
U savieckija ž časy kałarytny vakzał ablubavali kiniematahrafisty. Raniej u viosku amal kožny hod pryjazdžali zdymačnyja hrupy jak z «Biełaruśfilma», tak i ź Litoŭskaj kinastudyi.
Znajdzicie čas, kab ubačyć u Pareččy jašče i miascovyja chramy. Katalicki kaścioł Dzievy Maryi i pravasłaŭnaja carkva Kazanskaj ikony Božaj maci — abiedźvie hetyja śviatyni pabudavanyja z dreva na pačatku 20 stahodździa i dobra adrestaŭravanyja.
Pałac Druckich-Lubieckich (Ščučyn)
Kaardynaty GPS: 53.60684, 24.73915
Fota: marshruting.com
Hety kompleks kanca 19 stahodździa ličać vizitnaj kartkaj Ščučyna. Pałac Druckich-Lubieckich — dvuchpaviarchovy budynak u styli kłasicyzmu, pabudavany pa prajekcie vilenskaha architektara Tadevuša Rastvaroŭskaha.
Jon u niečym padobny da pałaca Mały Tryanon na terytoryi taho samaha Viersala.
Pałac adnoŭleny, tamu ŭnutry jość na što pahladzieć. Ale ž ciapier u pabudovie znachodzicca miascovy pałac tvorčaści dziaciej i moładzi, i tolki niekalki pakojaŭ samoha pałaca addadzienyja maleńkamu muzieju.
Troicki kaścioł (Hrodzienski rajon, vioska Indura)
Kaardynaty GPS: 53.458698, 23.887456
Fota: ekskursii.by
Pieršy katalicki chram u Indury pabudavali jašče ŭ 1522 hodzie, ale jon byŭ draŭlany. Kamienny ž kaścioł źjaviŭsia tut na pačatku 19 stahodździa i byŭ adkryty navat u savieckija časy, kali ŭ im słužyli śviatary-jezuity.
U hetym pryhožym śvietłym chramie jość svaja cudatvornaja ikona — abraz Maci Božaj Indurskaj. Unutry vy ŭbačycie taksama try draŭlanyja ałtary ŭ styli poźniaha kłasicyzmu, staražytny baročny arhan i maštabnyja freski 1900 hoda stvareńnia na biblejskija siužety.
Indura viadomaja svaimi vielikodnymi vierbami: tut śviatočnyja «bukiety» stvarajuć vyklučna ź biełaj viarby i ŭpryhožvajuć travami, kałośsiem i suchaćvietam.
Kaplica śviatoha Rocha (Hrodzienski rajon, vioska Hrandzičy)
Kaardynaty GPS: 53.72, 23.813611111
Fota: msj.by
Pry kancy padarožža možna zazirnuć u hety pryhožy maleńki chram 1906 hoda pabudovy. Kaplica vykananaja ŭ nieahatyčnym styli na miescy raniejšaha draŭlanaha chrama, viadomaha z 1840 hoda, aŭtaram novaha chrama staŭ hrodzienski hubiernski architektar Uładzimir Sroka. U 1980-ja hady kaplicu z žoŭtaj cehły adrestaŭryravali.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Češski Raj. Ad zamka da zamka: zachaplalny maršrut dla piešaha padarožža pa słavianskim pahraniččy
